Casimero moabot na

CEBU, Philippines - Moabot na karong adlawa dinhi sa Sugbu ang bag-ong IBF light flyweight champion nga si Johnriel 'Quadro Alas' Casimero gikan sa iyang malampusong   kampanya didto sa Argentina.

Ang Team Casimero gikatakdang moabot didto sa Mactan Cebu International Airport (MCIA) sa alas-4 sa hapon ug himuon dayon ang motorkada padulong sa Baseline Restaurant diin ipahigayon ang news conference.

Ang maong mainiton nga pagsugat igo na aron mohupay sa kalisang ug kaguol nga nasinati ni Casimero uban ang iyang kampo human sila gitabanga'g ataki sa mga boxing fans.

Usa ka ngil-ad nga "riot" ang miulbo didto sa Argentina niadtong Sabado pipila lang ka gutlo human gibayaw si Casimero nga kampiyon dihang gitumba niya ang Argentinian boxer nga si Luis Alberto 'El Mosquito' Lazarte.

Gawas ni Casimero, lakip sa mga nakahiagum og bun-og sa lawas mao ang iyang promoter nga si Sammy Gello-ani, trainer nga si Pingping Tepora Jr. ug American boxing agent nga si Sean Gibbons.

Dili magdugay dinhi sa Sugbu ang 22-anyos nga si Casimero tungod kay molarga dayon kini paingon sa Ormoc ugmang adlawa aron mobilar sa haya sa iyang igsuon nga namatay tungod sa sakit sa kasingkasing.  (BANAT SPORTS)