Mavs daog sa 2 OT batok Portland

CEBU, Philippines - Mihipos og 20 puntos si Dirk Nowitzki ug midugang si Jason Terry og 19 puntos aron baswaton ang Dallas Mavericks ngadto sa makutas nga 97-94 double overtime victory batok sa Portland Trail Blazers kagahapon sa nagpadayong National Basketball Association (NBA) regular season didto sa American Airlines Center didto sa Dallas, Texas.

Ang unom ka sagunson nga puntos ni Delonte West sa double overtime maoy nahimong yawe sa kadaugan sa wala pa ang insurance basket ni Nowitzki, ang 2011 Finals MVP.

Ang kanhi Dallas high school star nga si LaMarcus Aldridge mibahug og 33 puntos, 15 niini sa fourth period atol sa ilang mainitong rally ug si Jamal Crawford miamot og 19 puntos alang sa pilderong Trail Blazers.

Midugang sab si Shawn Marion og 14 puntos uban sa iyang 12 ka rebounds alang sa Dallas kinsa mikulit na og tulo ka sunod-sunod nga daog. Ang sayis puntos ni West maoy mihatag sa Dallas og 93-89 nga labaw sa nahibiling 2:55 sa duwa.

Si Crawford maoy nagtabla sa duwa sa 93-all pinaagi sa duha ka free throws apan gitubag dayon kini ni Brendan Haywood sa iyang follow-up may 45 segundos ang nahibiling oras sa second overtime aron hatagan og 95-93 nga labaw ang Dallas.

Human sa sipyat ni Crawford, si Nowitzki maoy miselyado sa duwa pinaagi sa iyang 15-foot fadeaway basket sa kataposang 16.9 segundos sa second OT alang sa 97-93 nga abante.

Gikan pa sa daog ang Dallas didto sa Minnesota 104-97 samtang midaug sab ang Portland sa ilang road game batok sa New Orleans, 94-86.

Bisan pa'g nabiyaan ang Portland ug 18 puntos, naka-apas sila didto sa third period.

Sa laing duwa, nagmangtas na sab ang American-born Chinese player nga si Jeremy Lin aron mahimong bayani sa New York Knicks, 100-98, midaug ang Denver batok sa Indiana, 113-109, gilubong sa Philadelphia ang Cleveland, 99-84, naka-eskapo ang Orlando batok sa Minnesota, 99-94, gilat-an sa L.A. clippers ang Charlotte, 111-86, gilubong sa San Antonio ang New Jersey, 103-89 ug midaug ang Phoenix batok Sacramento, 98-84. NBA.com