GAB, lihok pud intawon

Sa miaging semana, nitawag ko ni Dr. Nasser Cruz, ang boxing division chief sa Games and Amusements Board (GAB) kay aron lagi mohimo og dugang pakisusi kabahin sa mapait nga nadangatan sa boksidor nga si Karlo Maquinto. Ngadto sa wala pa masayod, si Maquinto mao ang boksidor nga na-comatose human sa away niini batok ni Mark Joseph Costa ubos sa promosyon ni kanhi two-time world champion Gerry "Fearless" Peñalosa niadtong Enero 28 didto sa Recom Dome sa dakbayan sa Caloocan. Subo palandongon, si Maquinto mitaliwan na sa laing kalibotan niadtong Huwebes sa hapon.

Sa dihang akong gipangutana si Dr. Cruz, nga akong gibinisaya kay lumad man siya nga taga Bohol, mura siya og nahutdan og laway. Ako siyang gisukna kun unsay ilang lakang kabahin sa nahitabo, duna ba sila'y ikaambag ngadto ni Maquinto ug sa pamilya niini ug duna ba sila'y pandayon nga mga polisiya aron maproteksiyonan ang atong mga boksidor batok sa susamang trahedya.

Layo pa ang Semana Santa, apan mura'g nahisama na hinuon si Dr. Cruz ngadtong Pontio Pilato, dali kaayong nakapanghunaw sa isyu. Imbes nga tubagon ang akong mga pangutana, iya hinuon kong gipasa sa GAB Board kay sila daw ang anaa sa hustong posisyon nga makatubag sa akong mga pangutana. Nakuryoso hinuon ko kun unsa gyud ang tinuod nga trabaho ni Dr. Cruz. Dili ba Sir ikaw maoy boxing division chief sa GAB?

* * *

Human sa insidente nga may kalambigitan ni Maquinto, dali kaayong nakaluwat og pamahayag ang mga kadagkuan sa GAB didto sa kaulohan nga sa maong peligrosong klase sa paugnat sa kusog, dili kalikayan ang maong hitabo. Miinsister sab ang GAB nga wala sila'y nahimong pagpabaya sa ilang responsibilidad kabahin sa maong promosyon.

Mao ba? Kun wala pa mo magtanga sa inyong katungdanan, nganong wala man ninyo masuta nga wala diay tangke sa oxygen, neck brace ug slantboard ang ambulansiya nga naka-standby aron moresponde kun dunay emergency situation nga motumaw sama sa nahitabo ni Maquinto? Pastilan baya mo uy!

Mismo man gani si reperi Bruce MacTavish nagdumili pag-officiate sa sunod nga bout kun wala siya'y makitang oxygen tank mao nang nalangan ang pagpadayon sa maong boxing card og dul-an sa 30 minutos.

* * *

Dili nato malalis ang argumento nga sa boksing, dili kalikayan nga dunay mga kinabuhi nga makalas. Brutal man gud ang maong matang sa isport, kay sagad sa duha ka magbinukbukay ibabaw sa ring, ulo may puntiriyahon sa usa'g-usa. Huna-hunaa na lang daan nga tay-ugon ang imong ulo og solidong mga kinumo, dili ba kuyaw kaayo?

Apan wala tay mahimo gumikan kay ang boksing gihangop na man sa tibuok kalibutan gumikan sa grabe nga kalingaw ug kahinam nga idalit niini ngadto sa mga manan-away. Dinhi sa Pilipinas ug sa ubang nasud, daghan ang na-engganyo nga mag-boxer kay ila kining gilantaw nga hagdanan aron makahaw-as sila gikan sa tumang kakabus. Para sa uban, ang pamuksing maoy bulawanong yawi nga makaabli sa ilang pultahan ngadto sa maayong ugma.

Mao na nga manawagan ko sa liderato sa GAB nga mohulma unta sila og maanindot nga mga programa alang sa atong mga boksidor. Tinuod nga lisud ang paghatag og insurance sa mga boxers kay way kompaniya nga mosukol niini gumikan kay risgo kaayo nga isport ang boksidor.

Apan syaro na man sab og dili sila makabubo bisan gamay sa ilang pundo pag-ambag kun dunay madisgrasya nga boksidor. Ngadto sa mga retirado na ug sa mga boksidor nga dili na makabalik og pamuksing gumikan kay dili na kaya sa ilang lawas, syaro na man sab og dili makapangita ang GAB og bisan unsang matang sa hinabang aron magkinaunsa duna sila'y kapanginabuhian.

Singot ug dugo. Mao baya ni ang puhonan sa atong mga boksidor sa ilang tinguha nga makahatag og garbo ug kadungganan sa atong nasud. Suklian pud unta nato sila og kamaayohan ilabi na sa higayon nga sila mahagba ug nanginahanglan nga agakon. Mao na nga isip nagpakabana, awhag nako sa GAB nga lihok pud intawon mo diha.

* * *

Belated happy birthday greetings diay sa akong higala nga si Mrs. Lilah Samson-Alvarez, nga atua na karon nanimpad sa Darwin City, Australia uban sa mapinanggaon niyang kapikas nga si Felix. Nikatawa ra ba iyang manghod nga si Homer Samson diha sa M. Lhuillier-Ibabao, Mandaue Branch sa dihang akong giingnan nga si Lilah 20 years old pa with over 10 years of experience. Cheers!

Kun dunay mga komentaryo o reaksiyon, mahimong mo-email sa [email protected]