Melindo, Esquer nagbinaharay

CEBU, Philippines - Nag-awas sama sa tubod ang kompiyansa ni WBO Intercontinental flyweight champion Milan 'El Metodico' Melindo diin misaad og usa ka sayon nga kadaugan batok ni Mexican Juan 'Panterita' Esquer sa main event sa "Pinoy Pride XI: Philippines vs. The World" karong Sabado sa gabii didto sa Waterfront Cebu City Hotel and Casino.

Ang duha nagkita sa labing unang higayon atol sa press conference kagahapon didto sa Aegean Room sa Waterfront Hotel.

Atol sa press conference, sila si Melindo (25-0, 9KOs) ug Esquer (27-9, 21KOs) daw dili na kapaabot og Sabado ug nagbinaharay kini sa usa'g-usa.

Matud ni Melindo nga wala siya mahulga ni Esquer ug dili niya tugotan ang langyaw'ng mobabag sa iyang dalan alang sa iyang damgo nga world title shot.

"This fight is very easy for me," matud pa ni Melindo. "Yes he can beat me but only in his dreams."

Sa iyang bahin, kalma nga gitubag ni former world title challenger Esquer ang pagbato ni Melindo ug iyang gitawag ang Pinoy boxer nga kuwang sa kasinatian dili sama sa iyang mga gikasangka nga world champion.

Gibaharan usab ni Esquer sa pinulongan Bisaya si Melindo.

"You will see on Saturday how Melindo will fall," matud pa ni Esquer. "Tumbahon tika."

Sa supporting main event,   duha ka knockout artists nga sila si Lorenzo 'Thunderbolt' Villanueva (21-0, 20KOs) ug Mexican Diego 'Tyson' Ledesma (18-4-2, 12KOs) ang magsukdanay sa ilang kusog ibabaw sa ring.

Sa undercards, si undefeated OPBF minimumweight titlist Merlito Sabillo (16-0, 7KOs) makigsangka ni Indonesian Sofyan Effendi (11-11-2, 9KOs), si Mhar Jhun Macahilig (13-1, 7 KOs) makigbatok ni Thai Kaichon Sor Vorapin (25-10, 9KOs) ug si Joseph Von Minoza (12-2, 5 KOs) moaway ni South Korean Yoo Shin Kim (8-2, 6KOs).

Ang official weigh-in gitakda karong alas-11 sa buntag didto sa The Event Centre sa SM City-Cebu.  (BANAT SPORTS)