CEBU, Philippines - Mag-atubang na sab og laing lisud nga away ang walay pildeng lightweight prospect nga si Mercito 'No Mercy' Gesta sa dihang iyang sangkaon ang Amerikanong si Manuel Perez karong adlawa didto sa Blue Water Resort and Casino sa Parker, Arizona.
Ang taga-barangay Labogon, Mandaue City nga si Gesta, kinsa gihulagway ni Top Rank Inc. big boss Bob Arum nga maoy mosunod sa lakang ni Manny Pacquiao, laraw nga moposte sa ika-23 niyang daog.
Ikaduha sa ranking sa WBO, si Gesta mopamatuod usab nga usa siya sa mga angay kahadlokan sa 135 lbs. division ug tuyo usab ni Gesta nga makuha niya ang usa ka world title fight batok ni WBA champion Brandon 'Bam Bam' Rios.
Si Gesta lab-as pa gikan sa iyang mabangis nga kadaugan batok ni Mexican Jorge 'El Tigre' Pimentel niadtong Hulyo didto sa Home Depot Center sa California.
Ang 23-anyos nga si Gesta didto nag-ensayo sa Wild Card Gym ni Freddie Roach ubos sa giya ni US-based Filipino trainer Vince Parra. (BANATSPORTS)