Cobras nakaipsot

CEBU, Philippines - Nag-agi una og makutas nga duwa ang Southwestern University (SWU) Cobras sa wala pa nila ukoba ang 66-62 nga kadaugan batok sa University of Southern Philippines Foundation (USPF) Panthers sa second round sa 11th Cebu Schools Athletic Foundation Inc. (CESAFI) basketball season niadtong Martes sa gabii diha sa Cebu Coliseum.

Lain na usab unta nga upset ang mahitabo tungod kay bisan pa’g nabiyaan og daku ang Panthers, misikit sila sa nahabiling 12 segundos human sa lay-up ni Fritz Dajalos, 62-63.

Ang Panthers, kinsa midaog sa Cobras atol sa ilang unang engkuwentro, 62-59, daw sa mao unta gihapong matang sa duwa ang ilang gipatuman dihang mikulit sila’g "come-from-behind" nga kadaugan, apan ilang giusikan ang maong higayon sa pagdaog dihang wala nila makuha ang bola nga didto motugpa sa kamot ni Bonifacio Guillena sa katapusang 10.4 segundos human sa split charities ni Rene Pacquiao nga mihatag sa Cobras og dos puntos nga labaw, 64-62.

Ang Cobras nga nagtangag og 4-3 win-loss record, milabaw og 13 puntos, 47-34 gamit ang 15-2 run sa katapusang 2:16 sa third period.

Apan samtang nagdahum ang kadaghanan nga mao na kadto ang higayon nga mo-arangkada ang Cobras, kalit lang mibangon ang Panthers sa fourth period dihang mibawos kini pinaagi sa paglusad og 14-1 nga rally aron tablahon ang duwa sa 48-all nga may igong oras pa sa pagtrabaho aron mo-iskor og laing upset.

Si Pacquiao maoy topscorer    sa Cobras sa iyang 17 puntos, samtang ang 6-foot-6 Cameroonian center nga si Justin Aboude midugang og 15 puntos.

Si James Ferraren mao lang ang bugtong nakakuha og double figures alang sa Panthers sa iyang 10 puntos.

Puntos Matag Usa

SWU (66) - Pacquiao 17, Aboude 15, Armecin 8, Nalos 8, Bregondo 8, Guillena 7, Arong 3

USPF (62) - J. Ferraren 10, Dajalos 9, Sedurifa 8, Linao 8, Avila 7, E. Ferraren 6, Meca 6, Sollano 6 (BANAT NEWS)