CEBU, Philippines - Gisegundahan sa Smart Gilas Pilipinas ang dominante nilang kadaugan batok sa Qatar niadtong Miyerkules dihang ila usab nga gilatos ang Jordan, 80-71, sa miaging gabii sa ilang tune-up tournament didto sa San Juan Arena.
Nagmaya si Serbian coach Rajko Toroman sa maong kadaugan tungod kay ang Jordan ang giisip nga ikatulo sa labing kusgan nga koponan sa Asia nga ilang sangkaon sa 26th FIBA Asia championship karong Septiyembre 15 didto sa Wuhan China.
“We showed character against Jordan. It’s a very good game. We fared well against Asia ’s third-best team,” segun pa ni Toroman sa The Philippine Star.
Ang naturalized center nga si Marcus Douthit midarok og 17 puntos ug siyam ka rebounds, samtang si Marcio Lassiter miposa og 16 puntos ug Chris Tiu miamot og 10 puntos alang sa Gilas.
Atol sa FIBA Asia, ang Pilipinas unang moduwa batok sa Bahrain sa Huwebes. Nalakip ang Gilas sa bracket nga gilangkuban usab sa Bahrain, UAE ug power-house China. - BANAT NEWS