CEBU, Philippines - Naghari ang Mambaling sa pagbalik sa Cebu City Dancesport Barangay Circuit Competition 2011-2012 sa miaging adlaw didto sa Mabolo.
Ang Mambaling mikabkab og unom ka golds, tulo ka silvers ug upat ka bronzes. Ang tulo ka golds nadaog gikan sa modern category, samtang ang laing tulo gikan sa latin.
Nangu sa Mambaling mao sila si Shardie Abellana ug Marjorie Pasaje, kinsa nidominar sa adult latin competition. Ang Tejero nilang Jefreyl Palimocon ug Wingielyn Senajon maoy miangkon sa silver, samtang ang host Mabolo nilang Jack Bolotano ug Alaiza Mae Delantar misakmit sa bronze.
Nakatampo sab og daku sila si Adrean Veraces ug Guilla Calumba dihang nikabkab og mga bulawan sa junior open modern standard ug latin division.
Lain pang nidaog og bulawan alang sa Mambaling mao ang pambato sa modern standard nga sila si Jason Milla ug Jessa Pacanza alang sa junior closed category ug John Philip Ybañez ug Cindy Sebua sa youth open.
Sila si Justin Red Quijote ug Ivory Abapo nidaog sa latin youth open.
Ang Quiot-Pardo mihakot og lima ka golds, tulo ka silvers ug tulo sab ka bronzes, samtang ang San Nicolas nakaangkon og usa ka gold ug duha ka silvers aron pagpahiluna sa ikaduha ug ikatulo nga dapit sa overall.
Lain pang koponan nga nidaog og medalya mao ang Zapatera (1 gold, 2 silvers, 2 bronzes), Tejero (1 silver) ug Inayawan, Cogon ug Lahug nga pulos adunay tag-usa ka bronze medal. (BANATSPORTS)