CEBU, Philippines - Nahimo gihapon nga crowd- favorite ang Barangay Ginebra Kings didto sa Dubai diin moduwa kini batok sa Talk N' Text Tropang Texters sa katapusang adlaw sa overseas game sa 2011 PBA Governor's Cup.
Ang Ginebra nga kasamtangang nagtangag og 2-1 nga baraha maninguhang mohatag og lisud nga duwa sa top-seeded Tropang Texters sa alas-7 sa gabii didto sa Dubai (alas-11 sa gabii oras sa Pilipinas).
Gawas sa pagsakmit sa ikaduhang sunod-sunod nila nga daog, maisip sab kini nga pagpanimalos sa Ginebra ngadto sa Tropang Texters, kinsa mipilde kanila sa 2011 PBA Commissionerís Cup finals.
Ang Kings magsalig gihapon sa import nilang si Curtis Stinson, kinsa maoy responsable sa ilang kadaugan batok sa Meralco Bolts. - BANAT NEWS