Knockout na SAB

CEBU, Philippines -  Gipakita ni undefeated super bantamweight prospect Dodie Boy Peñalosa Jr. nga andam na siya sa mas dagkung hagit sa iyang karera pinaagi sa laing knockout nga kadaugan batok ni Jeffrey Jimenez sa main event sa “Dudong Kampiyon” didto sa Cebu Coliseum.

Kini ang ikalimang sunod-sunod nga knockout nga kadaugan sa anak ni kanhi two-time world champion Dodie Boy Peñalosa Sr. ug pag-umangkon ni legendary Gerry Peñalosa.

Hinuon, di lalim ang giagian ni Peñalosa batok ni Jimenez sa Casablanca Gym kinsa mihatag og lisud nga away ngadto sa 20-anyos nga Sugbuanong boksidor.

Sukwahi sa mga miagi niyang kontra, nakasugat og pagsuway si Peñalosa ni Jimenez kinsa maisugung nakigsinukliay kaniya og kumo sa pagsugud sa away.

Nagisian usab sa walang kilay si Peñalosa gikan sa accidental head butt ni Jimenez, apan inay mohinay, misamot kaagresibo ang batan-ong boksidor ug mipatama og mga makusug nga kombinasyon ngadto ni Jimenez sa ikatulong round.

Atol sa fourth round, hinay-hinay nga milubad ang kaabtik ni Jimenez nga maoy gigamit ni Peñalosa nga kahigayunan aron makapasulod og naghagurus nga   left hook sa lawas sa Manila-based boxer kinsa mitikoko sa kasakit ibabaw sa ring.

Misuway pagbarug si Jimenez, apan pakyas siya pagtubag sa ihap sa referee nga mihunong sa away sa nahibiling 58 segundos sa fourth round.

Sa supporting bout, miiskor usab og knockout nga kadaugan ang bantamweight prospect nga si Marvin Mabait batok ni Aljun Salogaol of Omega Boxing Gym atol sa round seven sa ilang away.

Ang “Dugong Kampiyon” boxing card ipasalida sa GMA News TV sa alas-10 sa buntag karong Hulyo 3. (BANAT)