Jett Latonio: Ex-USPF Panther karon Mechanical Engineer

CEBU, Philippines - Niadtong miaging semana didto sulod sa Cebu Coliseum, mapasigarbohon kaayong mipahibalo kanako ang coach sa University of Southern Philippines-Foundation (USPF) Panthers nga si Raul Latonio, Sr. kinsa mao sab ang coach sa Rose Aquarius Merchandising sa nagpadayong 5th CESAFI Partner’s Cup nga usa na karon ka full-fledged Mechanical Engineer ang iyang anak nga si Raoul “Jett” Latonio, Jr. nga pipila lang sa mga malamposong produkto sa Cebu Schools Athletic Foundation, Inc. (CESAFI).

Nasayud kitang tanan nga dili tiaw ang kinabuhi sa usa ka basketball player tungod kay kanunay silang lapoy ang kalawasan tungod sa kanunay nga praktis apan niadtong naninguha gyud ug maayo nga makahuman sa ilang kurso, dili sab kini babag alang sa ilang kalamposan.

Kaniadtong miaging Marso 19, 2011 diha sa Southwestern University, gipahigayon ang board examination alang sa Mechanical Engineering ug usa si Latonio sa liboan nga mikuha sa maong pasulit ug mipasar. Ang ilang oath-taking gikatakda karong umaabot Abril 25 diha sa Casino Español de Cebu. Makuha ni Latonio ang iyang lisensiya diha sa opisina sa Professional Regulations Commission (PRC) sa barangay Guadalupe.

Samtang nagtungha siya sa USPF sa kursong Mechanical Engineering, usa sa mga pambatong player sa Panthers si Latonio tungod sa iyang maayong pulso ug tukma kaayo sa iyang position nga shooting guard. Nagsugod ug duwa si Latonio sa USPF niadtong 1999 hangtod sa 2002 ug migradwar sa iyang kurso samtang nagduwa sila sa Cebu Basketball Federation (CBF) apan wala lang una siya mokuha’g board exam tungod kay nalingaw pa man siya sa iyang basketball career.

Sa iyang college years uban kang Rex Mangubat, Elvis Labares, Michael Sereño, Glenn Pendang, Aries Gloria ug Arletroy Mercader, duha ka higayon nga gibuntog sa Panthers and University of Cebu (UC) Webmasters sa sangka sa ikatulong pwesto ug mibalik kahuyang ang ilang team dihang nawagtang sila si Latonio ug mga kauban. Sila maoy labing usa sa maayong batch sa Panthers sa bag-ong henerasyon.

Siya maoy usa sa sinaligang scorer sa GMC Granny Goose dihang miduwa siya sa CBF ug usa sa labing paboritong player sa magtiayong Albert ug Kitty Tan dili lang tungod kay maayo siyang moduwa apan usa siya ka disiplinadong player nga dili makahatag ug problema ni coach Jun Tan.

Niadtong 2004 hangtod sa 2006, misalmot ang Granny Goose Tortillos sa Philippine Basketball League (PBL) nga aktibo pa kaayo niadtong mga panahona ubos ni commissioner Chino Trinidad.

Pipila sa iyang mga kauban mao si Joseph Ronald Quiñahan, Alfie Grijaldo, Chico Lanete ug Dennis Concha.

Si Latonio maoy ikatulong anak ni Raul o “Ola” nga nahimong professional samtang nagduwa isip varsity player. Ang iyang maguwang nga si Rhett Latonio nga karon maoy administrator sa Forum Center for Literacy sa Consolacion, kanhi player sa UC nga mi-graduate sab nga usa ka cum laude ug ang iyang manghud nga si Jeremiah o “Ayn” usa na karon ka registered nurse nga miggradwar sab sa USPF. Si Rhett nakakuha’g A ratings dihang mikuha siya’g masteral sa Mathematics didto sa Ateneo de Manila University dili pa lang dugay.

Dili pa lang dugay, mibakasyon makadiyot si Latonio didto sa Hongkong aron mabawi ang diyotay’ng pressure sa iyang pagsuroy-suroy didto sa Disneyland .

Tungod kay mga maayo man sa klase ang mga anak ni Latonio, daw sa dili sila maglisod pagpangita og trabaho sa umaabot nga mga adlaw. Gani, andam nang motrabahao si Jett sa PLDT.

Usa lang si Latonio sa ikapasigarbo sa CESAFI ug walay amahan nga susama kang Ola nga dili malipay sa nakab-ot niyang kalamposan.

* * *

Niadtong Sabado, Abril 16, ang atong higalang si Lorenzo “Chao” Sy maoy napiling presidente sa Amateur Boxing Association of the Philippines (ABAP) Cebu Chapter atol sa pinilaiy nga gipahigayon didto sa Cebu City Sports Center sa Abellana.Ang laing mga opisyales mao si Teddy Alivio, vice-president, napiling secretary ang inyong alagad sa SPORTSgab, treasurer si Dodie Boy Peñalosa, ang auditor mao si Felmar Gingoon, ang PRO si Jonifer Dultra ug ang lima ka sergeant-at-arms mao sila Tony Jumao-as, Edsel Tuñacao, Christopher Tepora, Roel Legaspi ug Krisvic Abarquez sa Carcar Boxing Club. Ang napiling business manager mao si Rommel Manlosa. Gipili sab nga ABAP consultant ang sports patron nga si Antonio “Beduy” Aldeguer sa ilado kaayong ALA Boxing Stable.  - BANAT NEWS