Nietes napatik sa kasaysayan

CEBU, Philippines - Mihatag na sab og laing dungog sa nasud si WBO minimumweight champion Donnie 'Ahas' Nietes human siya mapatik sa kasaysayan isip top five all time greatest boxer sa iyang dibisyon.

Sa libro nga giulohan og "Ultimate Book of Boxing Lists" nga gisuwat sa duha ka banggiitan ug labing respetadong boxing historians sa kalibotan nga sila si Bert Sugar ug Teddy Atlas, ang ALA world champion nga si Nietes gipasidunggan isip usa sa mga labing ngilngig nga minimumweight fighter sa kasaysayan.

Ang taga-Bacolod nga si Nietes misikat sa kalibotan sa boksing human milampos pagdepensa sa iyang bakus sa makatulo ka higayon didto sa Mexico batok sa mga Mehikanong challengers.

Si Nietes usab ang usa sa mga longest reigning Filipino world champions ikaduha ni legendary boxing Hall of Famer Gabriel 'Flash' Elorde.

Anaa na siya karon sa ikatulong tuig isip world champion, samtang si Elorde maoy naghupot sa record sa iyang pito ka tuig isip reigning champion.

Karong Abril, manalipod na sab si Nietes sa ALA fighter sa iyang korona sa main event sa "Pinoy Pride 5"   batok sa wala pa nganli nga kaatbang.  (BANAT NEWS)