Boom Boom daog sa 3rd RD TKO

CEBU, Philippines - Gipakita ni Rey “Boom Boom” Bautista nga hingpit nang nahibalik ang tinuoray niya nga kusug human sa makapabilib nga third round knockout nga kadaugan batok sa mortal niyang kontra nga si Mexican Alejandro "Zorrito" Barrera sa main event sa "Pinoy Pride 3" sa miaging gabii didto sa Waterfront Cebu City Hotel and Casino.

Daghan ang nagtuo nga maglisud na pagbalik si Bautista sa kanhi niya inawayan human mipailawum sa operasyon sa iyang kamot, apan gipamatud-an sa ALA superstar nga anaa gihapon kaniya ang katakus nga mohimo kaniya pag-usab nga world title contender.

Sama sa giatangan, puno sa kaligotgot ug brutal ang sinukliay sa kumo sa duha ka boksidor, apan milabaw si Bautista sa second round dihang midugo ang ilong sa Mehikano agi sa iyang makabungog nga hook ug straight punches.

Apan miabot ang takna nga gipaabot ni Bautista sa third round dihang milampos siya pagpaigo sa iyang hait nga left jab sa kilid sa Mehikano nga nakaluhod sa kasakit.

Dali ra usab nga mibarug si Barrera, apan wala siya'y nahimo dihang gipauwanan siya og kumo ni Bautista nga miresulta sa subli niyang paglup-og. Giiphan pa siya ni referee Bruce McTavich apan wala na makahimo pa pagbarug ang Mehikano sa 2:56 sa third round.

“Mas maayo siya (Barrera) karon pero kompiyansa ko nga mudaog ug naningkamot ko,” matud pa ni Bautista.“Saludo ko sa mga Meksikano nga boksidor pero ako ning gabhiona.”

Bukas hinuon nga gidawat ni Barrera ang iyang kapildehan ug midayeg siya sa gipakitang kusug ni Bautista. “He’s a good fighter, I came prepared but I got hit and that’s boxing. If Bautista trains more, no doubt he is going to be a world champion.”

Si Bautista misaka ngadto sa 30-2, 23KOs, samtang si Barrera nahagsa sa record nga 21-5, 14KOs.

Sa iyang bahin, si ALA Promotions president Michael Aldeguer mitug-an ngadto sa Banat News nga gihikay na nila karon ang sunod nga lakang ni Bautista nga mao ang pagsangka alang sa IBF international title karong Hunyo didto sa Bohol .

Sa supporting bout, impresibo usab ang gipakita ni Jason Pagara (25-1, 14 KOs) dihang iyang gipahayang ang Indonesian nga si Billy Sumba (18-2-1, 4 KOs ) pinaagi sa hook ngadto sa apapangig sa 2:53 sa first round.

Miiskor usab og TKO nga kadaugan ang Mindanao boxer nga si Edri Dapudong (21-3, 12 KOs) batok ni Indonesian Sofyan Effendi (10-11, 8KOs) sa seventh round, samtang (16-1, 3KOs) midaog via unanimous decision si Roli Gasca batok ni Joash Apericio (7-4, 4KOs). (BANAT NEWS)