CEBU, Philippines - Ang labing karaang cycling event sa Sugbu -- ang Tour ni Frank nga anaa na sa ika-10 ka tuig, mosikad karong weekend.
Aduna kini duha ka stages, ang criterium event nga ipahigayon karong Sabado didto sa north reclamation area sa Mandaue City ug ang road race karong Domingo nga manukad sa Toledo City ug molatas sa Trans-Central Highway palugsong dinhi sa siyudad sa Sugbu.
Ning tuiga, masaksihan usab ang panag-abot sa mga dekalibreng cyclists dinhi sa Pilipinas ug gawas sa nasud sama nila ni RP Team mountainbiker Niño Surban, RP standout Lloyd Lucien Reynante, 2010 Tour of Matabungkay 2nd over-all champion Michelle Lim ug ang Olympian ug 5-time All-Japan XC MTB champion nga si Takeya Kenji.
Gawas sa Japan, mopadala sab og mga entrante ang Hong Kong ug Singapore.
Gipaabot sab nga modagsa ang out-of-towners gikan sa Bohol, Leyte, Iligan ug Manila.
Ang lumba nga ipahinungod ni kanhi mountain bike patron Frank Gatdula, gipasiugdahan ni Archt. Miguel Flores sa Vellum Cycles. (BANAT NEWS)