CEBU, Philippines - Nahimong bida sila si Allan Sepe ug Centes Branañola sa Sunday Club-LLC, kinsa naka-eskapo loklok ang 77-76 nga kadaugan batok sa LLBA-Red sa LLBA Rollway All-Star Game niadtong Biyernes diha sa Villa Magallanes gym, Lapu-Lapu City.
Pirmeng naggukod ang Sunday Club gikan sa pagsugod ug sa tanto nilang paningkamot nakahigayon kini pagtabla paghuman sa third quarter, 56-all nga maoy miduslit sa kainit sa duwa.
Sa final period, nag-iyahay na'g palig-on sa depensa ang duha ka habig uban ang hait nga opensa. Nahimong kulbahinam ang aksiyon dihang nagligas na lang og uno punto, 75-76 pabor sa LLBA-Red, apan si Branañola nakakawat og bola gikan ni Paulo Villamor ug dayong pasa ngadto ni Sepe, kinsa mitira sa iyang mahinungdanong itsa sa daginutong segundos alang sa kadaugan sa Sunday Club-LLC.
Si Amay Palad maoy topscorer sa Sunday Club-LLC sa iyang 17 puntos, gisundan ni Branañola nga adunay 11 puntos, samtang si Sepe adunay sayes puntos. Wala kaayo mokugi si team owner Rolly dela Pieza, kinsa igo lang mi-iskor og singko puntos.
Ang naparot nga LLBA-Red ni playing coach Archie Ompad gipangulohan ni Rene Cuadra nga miburak og 15 puntos, si Armand Lamoste mitimang og 14 puntos, samtang si Jack Soler miariya og 10 puntos.
Sa laing duwa, sukwahi sa ilang igsuong koponan, ang LLBA-Blue milubong sa Thursday Club-Jugan Consolacion sa iskor nga 77-67.
Wala mokompiyansa ang playing coach sa LLBA-Blue nga si Billy Nadado ug wala na lang usab siya moduwa sa tuyo nga iyang matan-aw ang dagan sa duwa.
Upat ka players sa LLBA-Blue ang mituhog og double figures nga gipangulohan ni Allan Yu pinaagi sa iyang 11 puntos. Sila si Diego Tampus, Pompie Ngujo ug Ondo Cadungog miabuno og 10 puntos matag usa.
Bugtong si Jerome Taborada ang milansang og double figures alang sa Thursday Club sa iyang 12 puntos. Si Jugan Brgy. Councilor Tony Pepito miamot og otso puntos, si councilor Dado Ygot mitampo og sayes puntos, samtang laing councilor nga si B. Pepito mitira og dos puntos.
Puntos Matag Usa
Unang duwa:
SUNDAY CLUB-LLC (77) - Palad 17, Branañola 11, Pleños 9, Aparente 8, Almacin 7, Balberona 6, Casquejo 6, Sepe 6, R. dela Pieza 5, Villapez 1
LLBA-RED (76) - Cuadra 15, Lamoste 14, Soler 10, Ompad 8, Villamor 6, Ouano 5, Medina 5, Dignos 4, Dela Peña 4, Bontes 3, Intong 2
Ikaduhang duwa:
LLBA-BLUE (77) - Yu 11, Tampus 10, Ngujo 10, Cadungog 10, Magat 7, Igot 6, Ganto 6, Adlit 6, Ochea 4, Fuentes 4, Bascon 4, Augusto 3
THURSDAY CLUB (67) - Taborada 12, Sasiing 8, T. Pepito 8, Bagondo 7, Brix 6, Ygot 6, Cabahug 5, E. Pepito 4, Gonzaga 4, Mascariñas 3, Rodrigo 2, B. Pepito 2. - BANAT NEWS