Inayawan, Guadalupe daog

CEBU, Philippines - Kanhi CIT Wildcat nga si Joseph Guangco mipabuto og 29 puntos ug ang skipper niining si Robert Abasolo miabuno og 19 puntos dihang ang Inayawan milubong sa San Nicolas, 103-87, samtang ang Guadalupe mipilde sa Pardo, 117-107 sa Conor Cup Invitational basketball tournament sa Mambaling Sports Complex.

Ang Inayawan mitapos sa third period bitbit ang 29 puntos nga abante, 63-34, apan hinay-hinay kining nabadbad sa San Nicolas sa fourth period diin ilang nasilkit ang iskor ngadto na lang sa 11 puntos, 78-89 human sa three-point shot ni Reyland Jumalon.

Si Jumalon, kinsa adunay unom ka triples, maoy nangulo sa San Nicolas uban ang 22 puntos, gisundan ni Rene Toring sa iyang 21 puntos.

Sa laing aksiyon, si Wilson Gabucan ug team captain Alex Cainglet milansang og usa ka triple matag usa sa himalatyong segundos sa duwa aron   baswaton ang Guadalupe ngadto sa 117-107 nga kadaugan.

Si Arnel Gacho maoy nangu sa opensa sa Guadalupe sa iyang 25 puntos, si Gabucan mibahug og 24 puntos, samtang si Cainglet miposa og 20 puntos lakip na ang upat ka triples.

 Ang Pardo, kinsa niduwa nga wala sila si Vergel Abelong ug beteranong point guard   Raul Redulosa, gipangulohan ni Ope Abellana nga mikadlit og 25 puntos.

Ang double round elimination tapuson karong gabii uban sa Inayawan nga tinguhang mosakmit sa liderato batok sa Pardo.

Ang liga gipaluyohan sa Conor Forwarding ubos sa manedyer niining si Olive Paraguas. Ang commissioner     mao si coach Danny Duran.

Puntos Matag Usa

Unang duwa:

Inayawan (103) - Guangco 23, Abasolo 19, Cabrera 14, Toroy 13, Daculan 10, Jueves 8, Baguio 6, Abella 4

San Nicolas (87) - Jumalon 22, Toring 21, Aying 11, Caballero 11, Agpasa 10, Encorporado 7, Casquejo 3, Castro 2

Ikaduhang duwa:

Guadalupe (117) - Gacho 25, Gabucan 24, Cainglet 20, Vergara 18, Lopena 15, Galinato 12, Almonte 3

Pardo (107) - Abellana 25, Peras 19, Lumapas 18, Tabuco 14, Castañares 12, Tulda 10, Monte de Ramos 10, Eroy 2. - BANAT NEWS