CEBU, Philippines - Adunay paabuton nga international tournament ang Filipino chess masters dihang ang Pilipinas mo-host sa one-million dollar chess tournament sunod bulan.
Pagaulohan kini'g Florencio Campomanes Memorial Cup Chess Championships karong Agosto 28 hangtod sa Septiyembre 5 didto sa kaulohan.
Si FIDE president Kirsan Ilyumzhinov sa Russia misangon nga mo-finance ning internasyonal nga torneyo nga pahinungod ni anhing ug kanhi World Chess Federation (FIDE) president Florencio Campomanes.
Ang mga nasud, kinsa sakop sa Association of Southeast Asian Nations (ASEAN) ang makabenepisyo sa torneyo.
Ang kompetisyon bahinon sa 10 legs sa 10 ka tuig diin pan-an kini og $100,000 matag leg.
Ang matag leg adunay tulo ka dibisyon -- open, women ug challenge. Ang open category adunay ganting salapi nga $70,000, samtang ang women's class makadawat og $20,000.
Ang nahabiling $10,000 igahin alang sa challenge games.
Ang men's division champion mobulsa og $10,000, samtang ang women's ug challenge winners makadawat og $5,000 ug $3,000 matag usa.
Si Campomanes nagsilbe isip presidente sa FIDE gikan sa tuig 1982 hangtod sa 1995. Namatay siya niadtong Mayo sa edad nga 83. – BANAT NEWS