CEBU, Philippines - Gipilde ni Niño Surban ang anak sa iyang kanhi coach aron pagsakmit sa premiere class sa 2010 Phil-Am Mountainbike Extreme Circuit Challenge didto sa Sitio Bayong, Brgy. Tisa, ning siyudad.
Si Surban, kinsa giamuma ni RP coach Renato Mier mipukan sa anak sa naulahi nga si John sa combined open ug seniors division.
Si Mier mipahiluna sa ikaduhang dapit, samtang si Albert Basirgo napunta sa ikatulo sa open-seniors class.
Sa juniors division, si Elmer Navarro maoy miangkon sa unang dapit batok ni Delfin Delfin, samtang si Julius Diez igo lang mipahiluna sa ikatulo.
Si Joseph Miller maoy naghari sa veterans division, samtang si Dennis Macalaguing ug Ramon Espinsa nalandig sa ikaduha ug ikatulo.
Sa masters category, si Epie Ragasajo mao ang milangkat sa titulo, samtang sila si Arnie San Juan ug Diosdado Alvarador nahimutang sa ikaduha ug ikatulo.
Si Emen Rosil mao ang nanghawod sa executive, gisundan ni Jason Dorado ug Arche Lampon alang sa ikaduha ug ikatulo nga dapit.
Si Walter Matudan mao ang kinakusgan sa fatboys, si Florie Saraum naghari sa golden boys, samtang si Roman Sentilias mipatigbabaw sa beginners category sa maong kalihukan nga gipaluyohan sa Omega Pain Killer. (BANATNEWS)