Pacquiao pinaboran ni Hatton
MANILA, Philippines - Napatulog man siya via second-round KO noong Mayo 2, 2009, kinampihan pa rin ni Briton Ricky Hatton si Filipino Manny Pacquiao sakaling matuloy ang kanilang laban ni American Floyd Mayweather, Jr.
Sa panayam ng The National kahapon, sinabi ng tubong Manchester, United Kingdom na mananalo ang 31-anyos na si Pacquiao laban sa 33-anyos na si Mayweather sa kanilang pinaplantsang megafight sa Nobyembre 13 sa Las Vegas, Nevada.
“I would like to think Manny would win, because I have a lot of time for him,” sabi ni Hatton sa Filipino world-seven division champion. “He is a great man and a great person.”
Pinatulog ni Pacquiao si Hatton sa 2:59 ng second round ng kanilang laban sa MGM Grand sa Las Vegas upang agawin sa Briton fighter ang suot nitong International Boxing Organization (IBO) light welterweight crown.
Bumagsak rin si Hatton kay Mayweather sa tenth-round para mapanatili ng American warrior ang kanyang World Boxing Council (WBC) welterweight title noong Disyembre 8, 2007.
“I think Floyd is too good defensively. He is so hard to hit, and I think he might ultimately just have a few too many tricks up his sleeves for Manny,” ani Hatton kay Mayweather, naghayag kamakailan na magpapahinga muna ng isa hanggang dalawang taon para tutukan ang kanyang boxing gym.
Kung matutuloy ang kanilang salpukan kagaya ng pinaplano ni Bob Arum ng Top Rank Promotions, sinabi ni Hatton na ang sinumang mananalo kina Pacquiao at Mayweather ang tatanghaling ‘all-time great boxer’.
Kamakailan ay pinarangalan si Pacquiao ng Boxing Writers Asociation of America (BWAA) bilang “Fighter of the Year” at “Fighter of the Decade” kasunod ang nasabing pagpapapansin ni Mayweather.
Kasalukuyang tangan ni Pacquiao ang 51-3-2 win-loss-draw ring record kasama ang 38 KOs, habang dala ni Mayweather ang malinis na 41-0-0 (25 KOs) card at bitbit ni Hatton ang 45-2-0 (32 KOs) slate.
- Latest
- Trending
