Lakers balik sa finals

CEBU, Philippines - Gitiwasan sa defending champion Los Angeles Lakers ang Phoenix Suns pinaagi sa pag-iskor ug 111-103 nga kadaugan atol sa Game 6 sa ilang Western Conference Finals kagahapon aron mobalik sa NBA Finals didto sa US Airways Center sa Phoenix Arizona.

Ang Lakers kinsa igo lang mi-iskor og 103-101 nga kadaugan sa Game 5, maoy makigsangka sa 2008 champion Boston Celtics sugod karong Biyernes, Hunyo 4 didto sa Staples Center. Susama sa Lakers, gitapos sab sa Celtics ang ilang East finals batok sa Orlando Magic sa Game 6.

Mao kini ang ika-12 nga higayon nga mag-abot ang Lakers ug ang Celtics sa NBA Finals ug sila maoy labing premyadong franchise sa kasaysayan sa NBA. Ang Lakers nagtinguha sa ilang ika-16 nga korona sulod sa 31 ka higayon nga miabante sila sa finals samtang ang Celtics, ang labing mapasigarbuhong NBA team, nagtinguha sa ilang ika-18 nga korona.

Si Kobe Bryant mao gihapo’y naghatag og dakung danyos ngadto sa Suns dihang nakahimo siya’g nuybe puntos sa kataposang dos minutos sa duwa. Misikit ang Suns sa kataposang higayon, 100-107 pipila na lang ka segundos ang nahibilin sa wala pa hingpit nilang giselyado ang kadaugan.

Miburak og 37 puntos si Bryant uban sa unom ka rebounds ug duha ka asissts samtang si Ron Artest, ang bayani sa Game 5 diin igo lang siyang mohipos og kuatro puntos, mibahug og 25 puntos nga maoy labing daku niyang puntos sa playoffs.

Sila si Derek Fisher ug Andrew Bynum mi-iskor og 11 ug 10 puntos matag usa samtang napugngan sa Suns si Pau Gasol ngadto lang sa nuybe puntos ug si Lamar Odom igo lang mi-iskor og sayis puntos gikan sa bench.

Naglabaw og 18 puntos ang Lakers sa second period ug padayong naglabaw, 91-74 didto sa fourth quarter sa wala pa mosikit ang Suns.

Ang Suns gipangulohan ni Amar-e Stoudemire kinsa miposa og 27 puntos samtang si Steve Nash mihipos og 21 puntos uban sa iyang lima ka rebounds ug siyam ka assists atol sa iyang ika-118 nga playoff game, ang labing daghan sa usa ka player nga wala pa maka-abante sa NBA Finals.

Midugang og 13 puntos si Jason Ruchardson ug gikan sa bench, mihakot og 12 puntos si Channing Frye uban sa iyang 13 ka rebounds apan wala kaayo kahuygo sila si Grant Hill ug Jared Dudley. GGM gikan sa NBA.com (BANAT NEWS)