CEBU, Philippines - Nadiskaril ang away ni kanhi WBA ug WBC minimumweight titlist Katsunari Takayama sa Japan tungod sa wrist injury nga iyang naangkon samtang mipahigayon kini sa iyang inadlaw-adlaw'ng jogging nga nakapapha kaniya sa "Best of Boxing 1" fight card karong Sabado sa gabii diha sa Mandaue City Cultural and Sports Complex.
"Takayama, who was jogging and doing his final road work for his fight, tried to avoid an incoming vehicle and accidentally slipped injuring his right wrist in the process," matud pa ni ALA Promotions press relations officer Chad Cañares sa iyang pamahayag nga gipadala pinaagi sa e-mail.
Si Takayama, kinsa mao ang labing unang langyaw'ng boksidor nga mipalandong ubos sa nabantog nga ALA Gym, makigsinukliay unta'g kumo batok ni Jayson Rotoni. Ang iyang sangka magsilbe untang tune-up fight sa dili pa niya atubangon si South African boxer Tshepo Lee alang sa usa ka IBF eliminator karong Agosto.
Bisan pa sa wala damhang insidente, madayon gihapon ang maong boxing card diin si ALA knockout artist Larry 'Bon Jovi' Canillas posibleng moaway sa main event batok ni Dexter Mendoza. – BANAT NEWS