CEBU, Philippines - Ang giilang tennis princess sa Sugbu nga si Sally Mae Siso milansang og sunod-sunod nga daog batok sa iyang mga karibal sa Cebu City leg sa Smart-Head tennis competition kagahapon didto sa Cebu Country Club.
Si Siso maoy nihawod sa girls 16-under ug sa 18-under division.
Sa 16-under final, si Siso nakasugat og makutas nga duwa sa wala pa maangkon ang kulbahinam nga kadaugan 7-6 (7-6), 6-4 batok ni Crissan Mae Kintanar.
Nakasugat sab og hugot nga kumbati si Siso batok sa iyang igsuong si Sallydine ug sa gihapon miposte kini’g kulbahinan nga kadaugan, 6-4, 6-3 aron maangkon ang 18-under title.
Niadtong weekend, si Sally Mae Siso mikulit sab og sunod-sunod nga kadaugan pinaagi sa Lapu-Lapu leg sa mao gihapon nga event.
Sa laing bahin, si Godfrey Seno mitapos sa iyang kampanya pinaagi sa pagdaog og titulo ug runner-up trophy. Si Seno naghari sa boys 12-under category human gilatos si Jaffary Cariga, 6-4, 6-3, apan pakyas kini pagdaog og korona sa 14-under human miyukbo ngadto ni Jeleardo Amazona, 6-1, 6-0.
Si Arthur Craig Pantino mao ang midaog sa unisex 10-under title human giugbok si Francis Lambayan, 6-1, 6-1, samtang si Zethley Mae Alferez mibuntog ni Cherry Mae Toledo, 6-0, 6-2 aron paglangkat sa korona sa girls 12-under.
Gipukan ni Jenni Dizon si Chelsea Gacho, 6-3, 6-2 aron pagsakmit sa girls 14-under crown, samtang si Fritz Satera yano kaayong misakmit sa boys 16-under title human gilansang si Francis Parangan, 6-1, 6-1. Gipilde sab ni RJ Abarquez si Kurt Gerapusco, 6-1, 6-0 aron pagdaog sa boys 18-under title.
Ugma ang mga pambato sa Sugbu moduwa sa Palawan Pawnshop Age-Group tournament. – BANAT NEWS