Kuehne+Nagel nakaipsot, Teradyne daog

CEBU, Philippines - Naka-eskapo ang Kuehne+Nagel bitbit ang 48-46 nga kadaugan batok sa LCB sa kulbahinam nilang duwa sa 1st Elle Lao Cup basketball tournament didto sa Pusok gym sa Lapu-Lapu City.

Pagsugod pa lang, nagsinukliay dayon og mga puntos ang duha ka kampo hinungdan nga nagligas lang kini og uno punto sa halftime, 18-17, pabor sa Kuehne+Nagel.

Nausab ang tiyempo sa duwa dihang ang LCB sa kombinasyon nilang Ronald Rubio ug Rogelio Davila miilog sa labaw paghuman sa third period, 33-28. Apan ang   napukaw ang nahikatulog nga Kuehne+Nagel dihang mikiat sila si Juro Talingting ug Brian Sapina nga parehong mihansak og doubles figures alang sa maong kadaugan.

Si Talingting miburak og 16 puntos, samtang si Sapina mibugha og 10 puntos ug si Leorne Cabilan miligwat og nuybe puntos.

Si Rubio miugkat og 17 puntos ug si Davila miposte'g 12 puntos alang sa naparot nga LCB.

Sa sayo pa, ang Teradyne Phils. mikulit sab sa ilang unang daog pinaagi sa paglubong sa Airlift Asia sa iskor nga 62-47.

Si Michael Alcarde mibagdok og 24 puntos aron pangulohan ang Teradyne, gisundan ni Doms Colina nga mitimang og 15 puntos.

Ang pilderong Airlift Asia gipangulohan ni Alex Cabase, kinsa milansang og 13 puntos. Si Alan Culianag mitampo og 12 puntos ug si Arnel Librado miariya og siyete puntos.

PUNTOS MATAG USA

Unang duwa:

TERADYNE PHILS. (62) - Alcarde 24, Colina 15, Waffer 8, Cortezz 4, Del Mar 4, Sabac 4, Bustamante 3, Alilin 2

AIRLIFT ASIA (47) - Cabase 13, Culianag 12, Librado 7, Payot 6, Estorba 3, Juntilla 2, Arriesgado 2, Salarza 2

Ikaduhang duwa:

KUEHNE+NAGEL (48) - Talingtong 16, Sapina 10, Cabilan 9, Acuardo 5, Optiana 4, Limbaga 3, Abuso 1

LCB (46) - Rubio 17, Davila 12, Canonigo 6, Sepocado 4, Piañar 4   (BANATNEWS)