CEBU, Philippines - Naghinam-hinam na karon ang pamilya ni Z "The Dream" Gorres sa gikatakdang pag-uli sa Pinoy boxer karong Pebrero 4 dinhi sa Sugbu human sa kapin tulo ka buwan niya nga pagkalandig didto sa University Medical Center (UMC) sa Las Vegas diin siya mipa-ilawum sa operasyon sa utok.
Ang ALA fighter nga si Gorres uban ang iyang kapikas nga si Datches migawas na ngadto sa UMC niadtong miaging Huwebes ug kasamtangan karong nag-istar sa pinuy-anan sa usa ka medical staff ni Dr. Benito Calderon kinsa mao ang doctor nga mutabang sa boksidor sa iyang rehabilitasyon.
Si Datches mipahibalo usab sa dakung kalambuan nga gipakita sa iyang bana nga si Z kinsa makahinay-hinay na og lakaw nga maoy usa sa mga nindot nga timailhan nga epektibo ang therapy nga gi-agian karon sa boksidor.
Ang lumad nga taga-Nasipit, Agusan del Norte nga si Gorres, gi-operahan sa walang bahin sa iyang utok human siya mawad-i sa panimuot ug na-comatose pipila ka gutlo gikan siya gideklarar nga mananaug sa iyang sangka batok ni Colombian Luis Melendez niadtong Nobiyembre 13, 2009 didto sa House of Blues didto sa Mandalay Bay Hotel and Casino.
Tungod sa wala damhang insidente, hingpit nang nahanaw ang kahigayunan nga mo-away pa og balik ang bantamweight prospect nga si Z, apan gipasalig nang daan sa ALA Promotions nga aduna pay nagpaabot nga karera si Gorres sa boxing isip trainer. - Lemuel P. Maglinte gikan sa Philboxing