Mag-abot na sab mga dekalibreng teams sa Jiboren's Cup at its Best

CEBU, Philippines - Mga dekalibreng koponan dinhi sa Sugbu ang magsangka  sa lain na sab nga volleyball open competition nga ulohan og "Jiboren's Cup at its Best" karong Enero 16-17 diha sa Pasil Sports Complex.

Mangulo sa mga notadong koponan nga mopakita'g aksiyon ning duha ka adlaw nga kompetisyon mao ang Governor Gwen Garcia Unity Volleyball (GUV) Cup municipal cluster women's back-to-back champion Catmon ug ang men's inaugural champ Minglanilla.

Ang team Catmon ni coach Vilma Veloso maglaum gihapon sa abilidad nilang Methosheena Bate, Athena Sucalit, Catherine Marquez, Lanie Silvestre, Jerymie Montalvo, Gretchel Soltones ug Cristy Sucalit.

Sa laing bahin, ang Liloan ni coach Ondo Mosqueda mopakita sab og aksiyon human sa ilang tam-is nga kadaugan sa province-wide volleyball competition niadtong miaging bulan.

Ang Liloan pangulohan ni   RP Team member Junrey Sasing, naghangad sab kini sa suporta sa kanhi University of Southern Philippines Foundation (USPF) stalwarts Angellan Visoc, Clifford Café, Maynard Alijandrino ug James Ryan Rivera uban sa team captain sa University of the Visayas (UV) nga si Jade Becaldo ug ingon man sa team captain sa University of San Jose-Recoletos (USJ-R) Jackie Yrog-irog.

Ang Lapu-Lapu, kinsa milaylo pag-apil sa bag-o lang natapos nga GUV Cup, maoy unang nipadayag sa ilang partisipasyon sa women's ug men's division ning maong kompetisyon nga gipaluyohan ni Jingle Cabasa Leitz.

Gawas sa Catmon, Minglanilla ug Liloan, giawhag sab ni tournament manager Jessie Yungco ang nag-unang koponan sa city cluster sa men's ug women's division nga mao ang Mandaue ug Talisay, apan wala pa kini makadawat og kompirmasyon gikan sa mga tagsa-tagsa ka koponan.

Ang kampiyon mobulsa og P10,000, ang mopahiluna sa ikaduha makaangkon og P7,000, samtang ang ikatulo makadawat og P5,000 sa matag kategoriya. – BANAT NEWS