CEBU, Philippines - Ang Guadalupe Athletics Association (GAA) ubos sa ilang presidente Dr. Boy Te mosungasong sa mas lisud nga hagit sa dihang ilang sangkaon ang banggiitang CECABA All-Star nga gipangulohan ni three-point artist Chester Cokaliong sa exhibition game karong adlawa diha sa Guadalupe Sports Complex.
Ang maong "goodwill match" usa sa mga kalihukan sa kapistahan sa Birhen sa Guadalupe, ang patron sa Sugbu karong Disyembre 12.
Ang CECABA All-Star nga kompleto sa hinagiban pangulohan ni Chester Cokaliong ug sa iyang igsuon nga si Christopher, uban nilang Ricky Yu, Samuel Sia, Wilson Yu, Edwin Kaw, Joel Chan, Ryan Mendez, Richard Lanutan ug si Zotico 'Toko' Tan, ang head coach sa Cebu Eastern College (CEC) Dragons.
Dili sab hinuon madali-dali ang host GAA All-Star ni Te kay aduna sab kini mga hait nga hinagiban sama nila ni Vincent Reyes ug Jimbo Noel. Ang ubang sakop sa team mao sila si Joselito 'Mamah' Ocampo, Jeffrey Diola, Juanito Sasing, Andy Minoza, Calixto Perez, Greg Bamba, Tim Dinampo, bullstrong center Chito Hernandez ug ang beteranong point guard nga si Gaga Cabanilla, kanhi sakop sa Skygo Motors coaching staff.
Giangkon hinuon ni Te nga underdog sila batok sa CECABA All-Star ug magkaproblema unya kini kun sa higayon nga mangigo ang tang-ang si Cokaliong.
Ang exhibition game nga usa ka proyekto ni Te gipaluyohan sab sa Guadalupe Barangay Council ubos ni Brgy. Capt. Jingjing Faelnar. – BANAT NEWS