CEBU, Philippines - Masukod karon ang abilidad sa koponan sa Talisay batok sa mga koponan gikan sa unang distrito sa Gullas Cup Basketball and Volleyball tournament nga buksan karong Nobiyembre 7 didto sa Carcar Sports Complex, Carcar, Cebu.
Gawas sa Talisay, mopadala usab sa ilang kinusgang koponan ang lungsod sa Minglanilla, Naga, San Fernando, Carcar ug Sibonga nga magtigi sa volleyball men and women's open ug sa 22-below men’s basketball tournament.
Sa pakighinabi sa Banat News, si Engr. Jeanneth Villagonzalo nagkanayon nga ang koponan sa Talisay langkuban sa mga magduduwa gikan sa Cansojong ug San Roque nga mao ang mikampiyon sa Seniors ug SK division sa 2009 Mayors Cup Inter-Barangay tournament niadtong Oktubre 3.
Si Villagonzalo, kinsa mao sab ang Gullas Cup secretary, mipahibalo usab nga gidid-an nila ang mga varsity ug commercial players sa pagsalmot sa basketball tournament.
Ang mga events duwaon sa adlaw'ng Sabado ug Domingo. Ang volleyball himuon gikan sa buntag hangtod sa hapon, samtang ang basketball himuon sa matag gabii.
Ang maong torneyo gipasiugdahan ni 1st District Rep. Eduardo "Eddiegul' Gullas uban ni Sam-Sam Gullas, kinsa mao ang tournament director.
Giabagan sab kini ni Talisay City Councilor Rodi Cabigas, kinsa maoy commissioner sa basketball ug Dr. Nestor Velez sa volleyball. (FREEMAN NEWS)