CEBU, Philippines - Pormal na nga gibuksan kagahapon ang 1st Inter-Barangay Volleyball Competition diha sa ABC Building sa South Reclamation Properties (SRP).
Gisugdan ang kalihukan pinaagi sa parada uban sa 66 ka barangays gikan sa North ug South districts diin gibahin kini ngadto sa walo ka brackets.
Mga barangays nga misalmot ubos sa South district mao ang Tinago, Day-as, Pari-an, Tejero, Lorega, Carreta, Zapatera, T. Padilla ug Hipodromo sa Bracket-A, Bacayan, Bo. Luz, Lahug, Banilad Busay, Pit-os, San Jose, Budlaan, Apas ug Mabolo sa Bracket-B.
Ang Bracket-C naglakip sa Capitol Site, Sta. Cruz, Guadalupe, San Nicolas Proper, Kalunasan Duljo, Sawang Calero, Suba ug Pasil. Ang Ermita, Kamagayan, Sambag 1, Sambag 2, Sto. Niño, Kalubihan, San Roque ug Cogon Ramos maoy naglangkob sa Bracket-D. Ang Mambaling, Labangon, Punta Princesa, Kinasang-an, Basak Pardo, Bulacao, Basak San Nicolas, Poblacion Pardo ug Cogon Pardo sa Bracket-E.
Sa North district mao ang Binaliw, Lusaran, Paril, Cambinucot, Agsungot ug Pulangbato alang sa Bracket-F, ang Adlaon, Sirao, Taptap, Malobog, Tagbao, Pung-ol Sibugay ug Guba sa Bracket-G ug ang Sudlon 1, Sudlon 2, Sinsin, Buot-Taup, Bonbon, Babag ug Buhisan maoy nag-abot sa Bracket-H.
Si Tejero barangay councilor Gary Lao, kinsa mao ang over-all chairman sa maong torneyo nagkanayon nga ang game proper unya pa sugdan sa sunod buwan ug gikatakda kining mahuman sa bulan sa Disyembre.
Ang mga duwa ipahigayon matag Domingo gikan sa alas-8 sa buntag hangtod na sa alas-5 sa hapon sa managlahing binyu -- sa Don Vicente Rama Elementary School, San Roque Sports Complex, Tejero Sports Complex, Banilad Sports Complex, San Nicholas Proper Gym, Bonbon Sports Complex, Taptap Sports Complex ug Agsungut Sports Complex.
Ang maong torneyo gipasiugdahan sa Barangay Councilor’s League of the Philippines-Cebu City Chapter uban sa suporta sa kagamhanan sa siyudad sa Sugbu. (BANATNEWS)