CEBU, Philippines - Milansang sa ilang ikaduhang sunod-sunod nga daog ang Team Pitaju pinaagi sa paglubong sa LPG, 66-55 sa Association of Barangay Council (ABC) division sa 2009 Consolacion Fiesta basketball tournament diha sa Consolacion Sports Complex.
Sila si Tony ug Boboy Pepito miduslit og 13 puntos matag usa alang sa Pitaju, kinsa nilabaw og sayes puntos sa sayong bahin sa duwa, 12-6. Samtang nagkagamay ang oras, nagkadaku sab ang labaw sa Pitaju ug miabot kini og 11 puntos sa paghuman sa duwa.
Sila si Jaime Maglasang gikan sa barangay Pitogo, Rogelio Maquilan sa Tayud ug Gielzeck Dada sa barangay Jugan maoy mibahog og maayo sa Pitaju.
Sa ilang bahin, si Polog Brgy. Capt. Rey Balaba maoy topscorer alang sa LPG sa iyang 18 puntos, samtang si Ronnie Alimoren mihirit og 10 puntos.
Ang maong liga gipasiugdahan sa Consolacion Association of Barangay Council ubos sa liderato ni Ma. Analee Gungob ug sa Sangguniang Kabataan Federation (SKF) ni chairperson Madel Hyacinth Herrera. (BANATNEWS)