CEBU, Philippines - Gipalayas sa Management team sa Cebu Market Vendors and Development Cooperative (CEMVEDCO) ang Freedom Park cagers, 82-76 aron pag-angkon sa katapusang luna sa finals sa 2nd CEMVEDCO basketball tournament diha sa barangay Ermita, ning siyudad.
Harungon sa CEMVEDCO Management ni team captain Tony Piloton sa finals mao ang Ermita Tanods, kinsa maoy unang nakakuha og lingkoranan sa finals niadtong miaging semana.
Ang Freedom Park maoy unang naglabaw sa iskor nga 21-15, apan ang CEMVEDCO Management nakabawi pinaagi sa pagpabuhagay og 25-7 nga rally sa second period ug ilang nailog ang bentaha sa halftime, 40-28.
Misulbong pa ang labaw ngadto sa 18 puntos sa iskor nga 59-41 padulong na ngadto sa fourth period .
Bugtong konsolasyon sa Freedom Park mao ang pagkitkit sa labaw ngadto sa tres puntos, 72-75 sa katapusang dos minutos sa duwa.
Ang high-leaping forward nga si Paul Lemita maoy nangu sa CEMVEDCO Management pinaagi sa iyang 24 puntos, samtang si Piloton mikolekta og 16 puntos.
Ang presidente sa CEMVEDCO ug no. 1 councilor sa maong barangay nga si Erwin Goc-ong miamot og otso puntos, sila si Jake Balongkit ug Jomar Rosales nagkumboya og 25 puntos CEMVEDCO Management.
Si Jojo Emnace mihakot og 20 puntos, samtang si Christopher Perez mihipos og 19 puntos alang sa napalagpot nga Freedom Park.
Puntos Matag Usa
CEMVEDCO (82) - Lemita 24, Piloton 16, Balongkit 13, Rosales 12, Goc-ong 8, Miñoza 5, Tago 4
Freedom Park (76) - Emnace 20, Perez 19, Bacacao 15, Tumulak 14, Coyoca 6, Huab 2. - Gabby G. Malagar (BANAT NEWS)