CEBU, Philippines - Walo ka teams ang nisalmot sa gipahigayong 1st Garry B. Lao volleyball tournament nga gibuksan niadtong Pebrero 7 didto sa Sitio Sampaguita volleyball court sa Brgy. Tejero, ning siyudad.
Ang maanyag nga si Cutie del Mar, ang Chief of Staff ni Deputy Speaker ug North District Rep. Raul del Mar, mihatag sa iyang mahinungdanong mensahe ngadto sa mga partisipante atol sa opening ceremony.
Migahin sab siya og pundo alang sa special awards atol sa pagbukas ug ingon man sa umaabot nga awarding ceremony.
Matud pa ni Tejero Brgy. Councilor Garry B. Lao, nga nakahukom siya sa pagpasiugda og volleyball tournament aron malikay ang mga kabatan-onan nga sakop sa maong barangay sa ginadiling droga, inay motutok sa paugnat sa kusog.
Usa sab kini sa mga pamaagi ni Lao ngadto sa mga tawo nga nagpalingkod kaniya sa maong posisyon.
Ang maong torneyo gipaluyohan sab ni Brgy. Tejero Councilor Ian Arago, kanhi Brgy. Councilor Yaya Salcedo, Brgy. Tinago Councilor ug League of the Barangay Councilors Secretary Edith Fernandez ug Pastor Jonathan Santamaria sa Bob Hughes Christian Academy.
Ang duwa himuon matag adlaw'ng Biyernes, Sabado ug Domingo. Ang liga gikatakdang tapuson karong Marso 15, samtang ang awarding ceremony himuon sa Marso 21. – BANAT NEWS