Brgy. Ramos naghari sa 11th leg
Cebu - Ang barangay Ramos maoy nanghawod sa gipahigayong 11th leg sa Go Ching Hi-Martina-M. Lhuillier Cup Inter-Barangay Dancesport Competition didto sa barangay Pasil, ning siyudad.
Mikubkob ang Ramos og tulo ka bulawan sa open division. Ang host brgy. Pasil mitapos sa ikaduha nga mikabkab og usa ka gold ug usa sab ka silver, gisundan sa Guadalupe nga adunay usa ka gold ug ingon man usa ka bronze.
Ang Pardo adunay tag-usa ka gold, silver ug bronze, ang Cogon ug Lahug adunay tag-usa ka silver ug ang Labangon mihakot og usa ka bronze.
Ang gold sa Ramos naggikan nilang juveniles Theresa Andre ug Patrick Quiltaon, juniors Joy Jorie Baron ug Tripone Español pinaagi sa modern standard action ug Rachel Intong ug Roy Cabanlit sa latin youth division.
Ang duha ka golds nga nakabkab sa Pasil naggikan nilang Mark Geromil Orcullo ug Charisse Abellana sa youth standard.
Ang Guadalupe miposte og 1-2 finish sa juvenile latin division luyo sa paningkamot nilang Jhameille Basanez ug Paolo Usman ug Naditha Manubag ug Claren Roi Saldua.
Naka-gold sab ang Pardo kortesiya nilang Jhessa Mae Marathon ug Matthew Lumapas.
Dul-an sa 100 ka sumosugod apan may dakung potensiyal nga mga atleta ang nisalmot sa maong kompetisyon
nga gipasiugdahan sa Dancesport Team Cebu City. - Yoyo R. Abayan (BANAT NEWS)
- Latest
- Trending