Pinoy boxers nanghawod

Cebu - Milampos ang tulo ka Pinoy'ng boksidor pagdepensa sa ilang tagsa-tagsa ka korona dihang ilang gipilde ang bisitang Thai boxers sa undercard sa Michael Katsidis-Angel Ramirez WBO Asia-Pacific lightweight bout nga giulohan og "WAR" gabii sa Cebu Coliseum.

Unang nakadepensa sa korona mao ang 18-anyos nga si Marvin 'Marvelous' Sonsona, kinsa mipaluhod ni Liempetch Sor Veerapol sa ikaupat nga round aron magpabiling hari sa WBO Asia-Pacific Youth flyweight division.

Gidominar ni Sonsona lumad nga taga-General Santos City ang maong away gamit ang iyang mga hait ug kusog nga mga suntok hinungdan nga nagkapuliki si Veerapol sa pagpanagang. Usa ka makabungog ug solidong kumo nga nasabak ngadto sa apapangig ni Veerapol sa nahabiling 44 segundos sa ikaupat nga hugna maoy nakapahingpit sa kadaugan ni Sonsona. Si Sonsona nagbitbit karon og 11-0, 10KOs, samtang si Veerapol adunay 12-5, 8KOs nga rekord.

Nilampos sab si Anthony 'Rocky' Marcial sa pagdepensa sa iyang WBO Oriental junior lightweight title dihang iya sab nga gipakamang si Vachakarit Senayan sud lang sa unang hugna.

Ang Zamboangeño nga si Marcial (12-0, 11KOs) nga nahimong usa sa mga sparmate ni Katsidis, mipakamang ni Senayan (11-1, 9KOs) sa oras nga 1:58 sa round-one.

Sa supporting main event, ang WBO Oriental junior flyweight titlist nga si Ciso Morales (13-0, 9KOs) nipakita usab sa iyang kabangis dihang iyang gipahunong si Pichitchoke Singmanasak (14-8, 9KOs) sa nahabiling 2:59 sa ikalimang round.

Ang Boholano nga si Morales kinsa bag-o pa lang nibalik og away tungod sa injury nagbahis sa ikalimang round pinaagi sa pagpatama sa iyang mga hait nga kumo ngadto sa Thai challenger.

Tungod sa bangis nga atake ni Morales, misarasay si Singmanasak hinungdan nga gi-undang ang away. – BANAT NEWS