CEBU – Ang Philippine Sports Commission (PSC) commissioner nga si Fr. Vicente L. Uy, SVD mi-awhag sa mga batan-ong atleta sa pagbaton kanunay ug disiplina kay mao kana’y labing mahinungdanon nilang hiyas kung ugaling mahimo na silang inila nga amateur o professional players sa umaabot nga mga adlaw.
Gipadayag ni Fr. Uy ang iyang awhag atol sa iyang opening remarks atol sa pagbukas kagahapon sa Community Children’s Games diha sa Cebu City Sports Complex.
Matod pa ni Fr. Uy nga gikinahanglan gyud nga magmatinud-anon ang mga bata ug dili manikas sa duwa ug mas maayo pa gyud dili magsige og reklamo ngadto sa mga referees ug uban pang opisyales nga nagdumala sa kompetisyon.
Si Fr. Uy midalikyat gyud sa pagtambong sa opening ceremony ganinang buntag gikan sa Baguio City diin iyang gi-inspeksiyon ang mga sports facilities didto.
Matod pa ni Fr. Uy sa iyang mensahe, ang pagkamatinud-anon ug pagkadisiplinado sa usa ka atleta daku kaayo’g ikatabang sa umaabot kay wala’y mokuha nga mga team owners ug coaches kung badlongon ang usa ka player. Ang mga misalmot sa Community Children’s Games nagpangedaron lang og 12 anyos paubos ug kinahanglan lang sugdan sila’g pasabot unsay disiplina mentras bata pa sila.
Laing tumong sa maong kumpetisyon mao ang paghatag og exposure sa mga bata aron makaplagan ang ilang mga abilidad ug katakos sa mga coaches nga naniid lang kanila samtang sila nagduwa.Makahatag sab kini nila ug kahigayonan sa pagtungha sa dagkung kolehiyo nga libre sa higayon nga mahimo na silang varsity players.
May 13 ka teams ang misalmot kagahapon gikan sa nagkadaiyang barangays dinhi sa dakbayan sa Sugbo diin sila nagpakita sa ilang abilidad sa unom ka events nga mao ang athletics, badminton, tennis, basketball, volleyball ug chess. Pagahimoon dayon ang awarding ceremony ugma sa hapon diin makadawat sila’g mga tropeyo ug medalya.
Matod pa ni Fr. Uy nga napulo lang unta ka teams ang ilang dawaton tungod kay apiki sila sa budget apan maluoy siya sa tulo ka teams kung iyang balibaran kay interesado kaayo silang mo-apil.
Si Fr. Uy nagkanayon sab nga ang Children’s Games makahatag sab og higayon aron magkahiusa ang mga barangay leaders ug magkailhanay og maayo.
Hipanglantawan ni Fr. Uy nga mas madoble ang mosalmot nga teams sa sunod tuig ilabi na kung makita nila ang kainit sa kumpetisyon ug maoy makadani sa mga barangay officials sa pagsalmot.
Busa, gi-awhag sab ni Fr. Uy ang private sector sa pagbulig sa ilang proyekto nga naglantaw sa kaugmaon sa mga batang atleta dinhi sa Sugbo.
Iyang duolon si kanhi konsehal Augustos Joy Young sa pagtabang kanila sa maong kalihokan sunod tuig. (Gabby G. Malagar) (BANAT NEWS)