MLSDF Selection nakaipsot

CEBU - Giprobahan sa MLSDF Selection nga usa sila ka lig-on ug lisud buntogon human makaipsot bitbit ang 85-84 nga kadaugan batok sa Salazar Colleges of Science and Institute of Technology (SCSIT) Baby Skyblazers sa 6th M. Lhuillier Kwarta Padala Under-21 Developmental Basketball League sa Consolacion Sports Complex.

Grabe kaayo kahugot ang duwa sa duha ka kampo gikan sa pagsugod hangtod sa katapusang upat ka minutos sa duwa. Sila si Dabuco ug Ferraren maoy misiak sa hugot nga duwa dihang ilang gipangulohan ang mainitong rally sa MLSDF. Sila si Dabuco ug Ferraren nagkumboya og 23 puntos, lakip na ang otso puntos sa katapusang dos sa duwa.

Ang SCSIT Baby Skyblazers nakahimo sa pagpatabla sa iskor, 75-all sa nahabiling 3:42 sa duwa, apan si Palos mipugas og 3-pointer atol sa ilang 5-0 run aron hatagan ang MLSDF Selection og singko puntos nga bentaha, 80-75.

Katapusang nakasikit ang SCSIT Baby Skyblazers sa iskor nga 81-83 gumikan kay si Bucayan milunod og duha ka free throws nga nakapabentaha og balik sa MLSDF Selection.

Ang MLSDF Selection pabiling nag-una sa bracket-A nga nagbitbit og 5-1 win-loss record ning tulo ka bulan nga torneyo nga gipasiugdahan sa M. Lhuillier Sports Development Foundation (MLSDF) pinaagi sa ilang executive director ug multi-titled coach Eddie B. Ybañez.

Puntos Matag Usa

MLSDF (85) - Dabuco 13, Ferraren 10, Cabahug 9, Sebial 9, Tabalin 9, Panerio 8, Otida 8, Villanil 6, Ybañez 6, Bucayan 4, Palos 3

SCSIT (84) - Amarado 32, Tampus 17, R. Bigno 7, E. Bigno 6, Maurillo 6, Llamido 5, Rabaya 4, Salazar 4, Paquibot 3. – BANAT NEWS