Melindo midaog pinaagi sa 3rd TKO vs. Fundi

CEBU - Milampos si World Boxing Organization (WBO) Asia Pacific minimumweight champion Milan Melindo pagdepensa sa iyang bakus pinaagi sa 3rd round TKO batok ni Tanzanian challenger Juma Fundi sa ilang away niadtong Huwebes sa gabii didto sa Atrium of Limketkai Mall sa Cagayan de Oro City.

Wala mosalir ang height-advantage ni Fundi ug giluya kini batok mas mubo nga si Melindo pinaagi sa body shots ug makalipong nga left hook ug gisundan sa kilid sa ulo hinungdan sa pagkalup-og sa African.

Misuway og barog  si Fundi apan gitiwasan kini ug nagkapuliki sa pagpanagang sa nagpugasi nga kinumo hinungdan nga gi-undang sa referee ang away sa oras nga 0:32 segundos sa ikatulong round.

Gumikan sa maong kadaugan, napanalipdan ni Melindo ang walay buling nga rekord (17-0, 5KOs), samtang mao kini ang ikaduhang pilde ni Fundi kansang unang pilde pinaagi sa points decision ngadto ni WBO Oriental flyweight champion Richie Mepranum niadtong Agosto didto sa Maasim, Sarangani. Si Fundi nagbitbit og 8-2 win-loss.

Sila si Melindo ug Fundi pulos nidaog sa ilang katapusang away. Si Melindo mipukan ni world-rated Carlos Melo sa Panama sa ilang away alang sa WBA Intercontinental light flyweight title niadtong Hulyo, samtang si Fundi mi-iskor og 1st round knockout nga daog batok ni Sadat Miyeyusho niadtong Agosto.

Sa laing away, ang 16-anyos nga si Jason Pagara, ang WBO Asia-Pacific Youth champion nidaog sa bakanteng Philippine lightweight title pinaagi sa unanimous decision batok ni Arnel Poras.

Ang tulo ka mga hurado mi-iskor og 116-111, 117-114, 115-111 pabor ni Pagara.

Ang beteranong si Jaime Barcelona mipukan ni Weng Haya pinaagi sa unanimous decision, si Romeo nidaog sab batok ni William Jorge.

Si Jerson Mancio mitumba ni Charlie Cabilla sa nahabiling 1:36 sa round four. Gitabla ang away nilang Leo Torres ug Ryan Makiputin tungod sa nahitabong accidental headbutts   sa third round nga miresulta sa dakung gisi sa mga kilay sa duha ka mga boksidor.

Si Mark Anthony Geraldo mi-iskor og usa ka third round KO batok ni Junrey Naive ug si Ronnel Suco mipaluhod ni Dondon Tumala sa second round. – BANAT NEWS