CEBU - Miabot na ang adlaw sa paghukom diin ang defending champion University of the Visayas (UV) Baby Lancers ug ang higpit niining karibal University of Cebu (UC) Junior Webmasters mag-abot sa deciding Game-5 aron pagdeterminar sa juniors division champion sa 8th Cebu Schools Athletic Foundation, Inc. (CESAFI) basketball event karong adlawa diha sa Cebu Coliseum.
Ang duwa gitakda sa alas-4:00 sa hapon.
Human magtabla sa 2-2 nga baraha, tinguha sa Baby Lancers nga sundon ang tunob sa ilang maguwang nga Green Lancers, kinsa milangkat sa ilang ikawalong korona niadtong Miyerkules human tiwasi ang University of San Jose Recoleos (USJ-R) Jaguars.
Lain unya kini nga double championships alang sa UV kun ang Baby Lancers molampus paglangkat sa titulo pinaagi sa come-from-behind fashion. Naunhan sila sa “best-of-five” series, 1-2, apan nakabawi sa Game-4, 66-72 aron pagpuwersa ngadto sa tinaktakay nga Game-5.
Kinahanglan nga dag-on sa Baby Lancers ang korona aron maoy ilang gasa ngadto ni UV president ug 1st District Rep. Eduardo R. Gullas, kinsa magsaulog sa iyang adlaw’ng natawhan karong Oktobre 13.
Tulo ka importanteng magduduwa mao karon ang magdala sa kampanya sa UV ug kini sila mao si Arvie Cabañero, John Michael Auditor ug Glennson Ybañez. Nanginahanglan sab sila sa suporta nilang Christian Fajardo ug Aldwin Felisario ug uban pa aron matugkad ang ilang tumong.
Sa habig sa Junior Webmasters, naglaum kini sa abilidad ni reigning MVP John Marty Pearce uban nilang Roger Pogoy, Christian Taboada, Gerald Ampoon, Patrick Tindoy, Alfred Codilla, Zandro Palileo ug Cherwill Solon. - BANAT NEWS