SCSIT Skyblazers mibuntog sa CNHS Black Shama

CEBU - Ang gibundak nga 12-0 run sa Salazar Colleges of Science and Institute of Technology (SCSIT) Baby Skyblazers sa katapusang upat ka minutos sa duwa nakatabang kanila pagbuntog sa host Consolacion National High School (CNHS) Black Shama, 79-69 sa 6th M. Lhuillier Kwarta Padala Under-21 Developmental Basketball League didto sa Consolacion Sports Complex.

Ang Baby Skyblazers ni coach Jojo Romarate nilabaw og singko puntos sa halftime, apan nawagtangan kini’g kusog sa third quarter nga nakasayon sa Black Shama sa paghimo og panimalos hangtod nga nailog ang labaw, 54-52 paghuman sa maong kuwarter.

Katapusang nakalabaw ang Black Shama sa iskor nga 69-67 kay ang Baby Skyblazers milusad og 12-0 nga rally aron mabugnaw ang kainit sa duwa ug ingon man pagposte sa ilang unang daog ning duha ka bulan nga torneyo nga gipasiugdahan sa M. Lhuillier Sports Development Foundation (MLSDF) pinaagi sa paningkamot sa ilang executive director ug multi-titled coach Eddie B. Ybañez.

Ang makampiyon mobulsa og P5,000, ang mipahiluna sa ikaduhang dapit makadawat og P3,000 ug ang ikatulo makaangkon og P2,000.

Gumikan kay usa ka fund raiser event, ang mga ganti idonar ngadto sa charitable institutions agad sa kabubot-on sa mga winners.

SCSIT (79) -- Amarado 21, Maurillo 14, Rabaya 13, Tampus 9, Salazar 8, Llamedo 7, Paquibot 5, Bigno 2

CNHS (69) -- Cadampog 15, Linao 14, Malagar 12, Tibalan 11, Najarro 8, Jabla 5, Ropal 3, Conde 1. – BANAT NEWS