CEBU - Milampos ang 24-anyos nga Mexican-American boxer nga si Juan “Baby Bull” Diaz (34-1, 17 KOs) sa pagsakmit sa International Boxing Organization (IBO) lightweight belt dihang iyang gipukan si Michael “The Great” Katsidis (23-2, 20 KOs) sa usa ka 12 round split decision niadtong miaging adlaw sa main event sa boxing event nga “No Retreat, No Surrender” didto sa Toyota Center, Houston Texas.
Ang kanhi WBO/WBA/IBF world lightweight champion nga si Diaz midaug pinaagi sa split decision batok sa kanhi WBO lightweight interim champion nga si Katsidis, ang duha sa tulo ka mga hurado nga sila si Gale Van Hory ug Levi Martinez mi-iskor og 116-112, 115-113 pabor sa Mehikano, samtang si Judge Glen Hamada mi-iskor og 115-113 pabor ngadto kang Katsidis. Sa maong away makita sa naw'ng sa duha ka boksidor kung kinsa ang nipatigbabaw, napuno sa bun-og ang naw'ng ni Katsidis lakip na niini ang gisi sa wala niining kilay samtang si Diaz igo lang nakaangkon og gamay’ng bukol sa ibabawng bahin sa iyang mata.
Sa undercard sa maong away, gipatumba sa Mehikanong si Rocky Juarez atol sa 2:55 sa 11th round ang Argentinian nga si Jorge Barrios alang sa World Boxing Organization (WBO) Latino junior lightweight championship.Sa maong kadaugan si Juarez mipalambo na karon sa iyang rekord nga (28-4, 20 KOs) samtang si Barrios natagak ngadto sa (47-4, 34 KOs). Laing milampos sa maong binukbukay mao ang lightweight nga si Jesus “El Matador” Chavez nga mipahagsa sa taga-Colombia nga si Andres Ledesma sa 9th round. - BANAT