Pakang

Ang manok susama og boksidor nga magkinahanglan sab og ensayo og maayo aron panahon sa away andam na kini. Kinahanglan nga anaa siya'y laraw sa maong away aron pagpataob sa kaatbang niini.

Ang pakang usa ka klase nga ehersisyo aron ang manok maanad sa sakit ug iyang makalkulo ang lihok ug distansya sa kaatbang niini kay sa kasakit siya makat-on kun unsaon niya pagkontrolar sa iyang lihok aron siya ang makapatikyaob sa kaatbang.

Dili sayon ang paghimo niini  kay nagkinahanglan kini og duha ka tawo nga maoy mogunit sa tagsa-tagsa ka manok. Ang pakang usa sa importante nga ehersisyo sa imong manok aron sa unang labok siguro ug klaro nga modapat gyud kini sa kaatbang kay naanad naman ang imong manok niini. Gikinahanglan kini og sakto nga pamaagi aron dili usab mabarda ang imong manok kun magpataka ka lang sab og pakang.

Bisan gani panahon sa pagpainit sa manok sulod sa sultada, ang pipila kanila ipakang ang manok sa dili pa kini buhian  aron mahinumduman sa manok ang iyang pagabuhaton panahon sa tinud- anay na nga away. Ang unang labok sa manok nagbaton sa iyang pinakakusog nga puwersa kay sa mosunod nga mga labok niini mao nga bentaha gyud kun ang imong manok naanad sa pakang gawas nga lig-on ang iyang tiil anaa siya'y kaisog nga modawat sa gikusgon sa labok sa kaatbang.

Ang pakang mao ang pag-abot sa duha ka manok diin gunitan sa duha ka handlers ang tagsa-tagsa ka ikog sa manok ug mag abot kini nga magnilabukay gamit ang ilang mga tiil. Apan inanay ang ilang pag-abot kay makontrolar man sila tungod sa paggunit sa ilang mga ikog. Dili fatal ang sakit nga mabati sa manok mao nga puwede silang makaadap sa inanay nga kasakit ug kusog sa kaatbang.

Makita nimo nga anaa nay nakat-onan ang imong manok sa pakang kay kun makapahulay kini dayon imong ilakdap makasinati og dakung kausaban ang  imong manok. Layo na ang lawas niini kun mopatiil sa kaatbang ug kalkulado na niya ang distansya sa kaatbang diin dili na sab kini pataka og sulod kay nasayod naman siya kun unsa ang iyang mahiagoman kun magpataka siya og sulod sa kaatbang. Dili na sab siya makurat sa gikusgon sa pako sa kaatbang ug segurista na sab kini. 

* * *

Mao kini ang mga benipisyo nga mahatag sa imong manok panahon sa sultada, ang abilidad sa manok gitunga sa duha anaay daan na sa iyang pagkaposa ug imong makita bisan dili nimo bansayon ang ikaduha makita lang kun bansayon na kini pinaagi sa pakang.  Ang pakang maoy garantisado nga paagi aron ang  manok magpakita og lihok panahon na sa sultada.

MANOK DEBUWENAS

(Pebrero 12, 2008)

Balhibo: Talisayon

Bulok sa tiil:  yellow