Nahanaw damgo sa MLSDF/ USJ-R

Wala nay paglaum ang  M. Lhuillier Sports Development Foundation (MLSDF)-sponsored University of San Jose-Recoletos (USJ-R) nga makatag-iya sa korona sa 2007 National University Games human kini mapilde sud sa upat ka sets sa Adamson University (AU) Falcons sa ilang bugno sa semifinal kagahapon didto sa University of St. La Salle (USLS)-Bacolod Gym.

Mao kini ang una ug bugtong pilde sa MLSDF/USJ-R sukad masukad ning usa ka semana nga torneyo diin nag-abot ang mga dekalibreng collegiate athletes dinhi sa nasud.

Sa sayo pa, ang  mga batos ni Cebu Sports Hall of Famer coach Grace Antigua miharos og daog sa upat ka duwa sa eliminasyon aron sa pagpanghawod sa Bracket A.

Sa pagsugod, ang USJ-R belles mipakita og maayong away diin ilang napapas ang otso puntos nga alkanse aron sa pagpatabla sa iskor, 20-20 sa wala pa mabuntog ang Falcons, 25-20 sa first set.

Hinuon, ang Falcons daling nakahimo og adjustments aron pagdaog sa sunod nga duha ka sets, 25-18, 25-20 ug ingon pag-una sa duwa, 2-1.

Ang Jaguars miaksiyon og gukod dihang mipakita kini og impresibo nga duwa sa fourth set, apan ang ilang mga paningkamot  wala makababag  sa  tinguha sa Falcons, kinsa mitukob og 25-23 nga kadaugan aron pag-abante ngadto sa finals.

Ang Jaguars moduwa lang alang sa ikatulong dapit karong adlawa batok sa midaog sa duwa tali sa Philippine Christian University (PCU) ug La Salle-Dasmariñas nga  padayon pang nagkumbati sa final berth atol sa pagsulat niini.