Green Lancers nakatabla, 1-1

Yano ra  kaayong  mibawos ang defending champion University of  the Visayas (UV) Green Lancers  pinaagi sa paglubong  sa University of San Carlos (USC) Warriors sa iskor nga 94-75 sa Game-2 sa ilang "best-of-five" final series sa 7th Cebu Schools Athletic Foundation, Inc. (CESAFI) basketball season niadtong Domingo sa gabii sa Cebu Coliseum.

Ang UV Green Lancers napukan sa Game-1 sa iskor nga 61-69 niadtong Sabado ug ang ilang kasinatian sa kampiyonato maoy gihimo nilang yawi pag-abli sa ganghaan sa kalamposan aron pagtabla sa serye, 1-1.

Ang Game-3 duwaon karong alas-6:00 sa gabii  ug ang modaog may dakung kahigayonan nga motapos sa Game-4 karong Huwebes.

Sa  tinguha nga dili mausban, ang Green Lancers mihimo og way makalisang  nga pangatake nga nakapaigpot  sa Warriors sa fourth quarter hinungdan nga ang naulahi igo lang gipa-iskor og kuwatro puntos sa tibuok kuwarter.

Human ang Warriors    mipasulod sa ilang katapusang basket sa ikatulong kuwarter gikan sa tres  ni Sam Jordan Hermosa  aron pagbaton og otso puntos nga bentaha, 69-61, ang Green Lancers mipauwan sa ilang mga puntos  og kitkit sa labaw.

Nahimong kulbahinam ang duwa human si Von Harry Lanete milansang og three-point  aron pagtabla sa iskor, 69-all.

Ang  Warriors, kinsa milabaw og 19 puntos sa third quarter sa iskor nga 53-34, naglisod na og bawi kay gipabuthan man kini og 25-0 run sa haring gangis  nga Green Lancers nga maoy ilang taytayan paglabang ngadto sa dalan sa kadaugan.

Ang lima ka triples nga naposa sa Green Lancers sa   katapusang kuwarter, usa sa nakatabang kanila pagpukan sa karibal nilang Warriors.

Si Ariel Mepaña nga adunay duha ka triples sa kinatibuk-an niyang 23 puntos maoy nangulo sa Green Lancers. Si Lanete miabuno og 18 puntos lakip na ang iyang upat ka three-point, samtang si Ritchum Dennison nga mibira og upat ka triples mitampo og  13 puntos. Sila si Michael Luga ug Rino Berame mikambiya og 12 puntos matag usa.

Ang kombinasyon nilang Enrico Llanto ug Niño Ramirez   nga mikati og 12 puntos matag usa mao usab ang  nangulo sa pilderong Warriors.