Beermen nilango ang Tigers

Katulad ng inaasahan, madaling nailigpit ng San Miguel Beer ang Coca-Cola dahil sa kabila ng hindi pag-upo ni head coach Chot Reyes sa bench, nailista pa rin ng Beermen ang kanilang ikaapat na sunod na panalo makaraang igupo ang Tigers, 108-91, tampok ang 19 puntos, 9 rebounds at 3 assists ni Danny Seigle sa 2006 PBA Philippine Cup kahapon sa Quezon Convention Center sa Lucena City.

Agad na kinontrol ng San Miguel, may 10-5 rekord ngayon sa ilalim ng Ginebra (10-4) at kasunod ang Red Bull Barakos (10-6), ang laro matapos kunin ang first half, 60-40, patungo sa kanilang 83-61 abante sa Coke, nahulog sa 4-12, sa third quarter.

 At mula rito ay hindi na lumingon pa ang mga Beermen, kinuha ang 108-89 bentahe sa huling 36 segundo mula sa isang slam dunk ni rookie Gabby Espinas, sa Tigers.

Pipilitin ng Sta. Lucia na makabangon mula sa isang three-game losing skid sa kanilang pakikipagtagpo sa Welcoat ngayong alas-4:05 ng hapon bago ang banggaan ng Talk ‘N Text at Air 21 sa alas-6:30 ng gabi sa Cuneta Astrodome.

Minamalas ang Realtors, nagmula sa 101-103 overtime loss sa Purefoods Chunkee Giants para sa magkatulad nilang 9-6 baraha kumpara sa 3-12 kartada ng Dragons, nasa isang six-game losing slump kung saan ang huli nilang kabiguan ay mula sa Red Bull, 78-97.

Sa ikalawang laro, asam ng Phone Pals na maduplika ang 109-96 pananaig sa Realtors sa kanilang pakikipagkita sa Express.(RC)