Torion balik PBA

Ang Sugbuanong pointguard nga si Jimwell Torion mobalik na og duwa sa Philippine Basketball Association dihang gikuha ang iyang serbisyo sa Sta. Lucia Realty.

"Aw excited kaayo ko nga mobalik og duwa sa PBA," matud pa ni Torion.

Si Torion gipaabot nga moduwa sa labing unang higayon uban sa Sta. Lucia karong Sabado diin ang Realtors makigharong batok sa Air21 Express sa usa ka out-of-town game didto sa probinsiya sa Isabela.

Nagkanayon hinuon si Torion nga dili kaayo taas ang kontrata nga gihatag kaniya sa Realtors.

"Seguro kutob ra ko sa June, pero magdepende na sa akong performance. Kung maayo ang akong showing team, willing man sila nga i-extend akong contract," matud pa ni Torion.

Sa iyang pagbalik sa PBA, si Torion mi-angkon nga daghan siya'g angayang usbon sa iyang kaugalingon, una ang kainit sa iyang ulo.

"Seguro ang akong temper kay dali man gud mo-init ang ulo sa duwa. Ako na usbon ug mo-focus lang gyud ko sa duwa," pasabot ni Torion.

Sa lima ka tuig niyang career sa PBA, si Torion nakasinati sab og daghang mga kakulian.

Na-aksidente siya sa wala pa sugdi ang 2000 season sa PBA nga posibleng makabugto unta sa iyang career human madombuli ang gimaheno niyang awto.

Apan ang labing bug-at nga kalbaryo nga gipas-an ni Torion nahitabo tulo ka tuig ang milabay dihang gisuspenso kini human masuta nga positibo siya sa ginadiling droga.

Si Torion gi-ban sab og walo ka bulan ug gipamulta pa kini og P70,000 gumikan sa "hard foul" batok ni Jimmy Alapag sa Talk 'N Txt.

Human sa lima ka bulan nga suspensiyon ug sa iyang pagpangayo og pasaylo, si Torion gipabalik og duwa sa PBA ni commissioner Noli Eala.

Sa laing bahin, si Torion mapasalamaton kaayo ni coach Jun Tan sa paghatag kaniya og higayon nga makaduwa sa Cebu Landmasters-Toledo sa bag-ong nahulma nga Mindanao Visayas Basketball Association (MVBA).

"Daku kaayo akong pasalamat ni coach Jun Tan sa oportunidad nga iyang gihatag nako nga makaduwa sa Toledo sa MVBA sa panahon nga wala pa koy team. Daku kaayo to og tabang nako labi na sa akong conditioning," matud pa ni Torion.

Sa iyang bahin, nanghinaut si Tan nga maayo ang dagan sa pagbalik ni Torion sa PBA. Miangkon si Tan nga makaapekto sa team ang pagbiya ni "Tora-Tora."

"Kabahin sa among team sa MVBA, daku gyud unta nga advantage namo kung naa si Torion pero wala tay mahimo. Ang amo ani nga mo-move on ug fight lang gihapon mi. Wala man sab mi magsalig og usa lang ka tawo kay team game gud ning basketball. Seguro dunay usa nga mo-show ani nga team," matud ni Tan.