Iligan 3-0 na sa MVBA

Ang pagka-mabayanihon ni Eduardo Pening sa Iligan City maoy nakasalbar ug naghatod sa iyang koponan ngadto sa kadaugan batok sa host-Cagayan de Oro Rapids sa nagpadayong Mindanao-Visayas Basketball Association (MVBA) didto sa nagsugwak nga Xavier University Gym sa Cagayan de Oro City.

Si Pening, kinsa maoy top-scorer sa iyang 21 puntos lakip na niini ang iyang layup sa nahabiling 11 segundos maoy naghatod sa Iligan ngadto sa ilang ikatulong sunod-sunod nga kadaugan.

Sakit kaayo ang naangkon nga kapildihan sa Cagayan tungod kay ila man nga gidominar ang duwa gani nilabaw kini og 15 puntos, 81-66 sa third quarter human nasulod ang triple ni Mark Benitez.

Nakabangon ang Iligan dihang si Aries Gloria mipabuto og nuybe puntos sa sayong bahin sa fourth quarter. Gikan niadto gikalingawan og kitkit ang labaw nilang Bognot ug Marvin Tundag hangtod nga nailog nila ang momentum sa nanghinapos nga bahin sa duwa.

Si Pening giabagan sab ni Erickson Araman, kinsa nipupo og 19 puntos, samtang sila si Bognot ug Gloria mihipos og 14 puntos matag usa.

Samtang si Jong Rebuya nga mikimada og 24 puntos maoy nangulo sa pilderong Rapids uban nilang Gabriel Maloloy-on nga adunay 17 puntos ug Abe Galinato nga miamot og 16 puntos.

Sa laing bahin, turno sab sa Pryce Pharma-Misamis Oriental ni MVBA chairman Gov. Oscar Moreno sa pagpakita sa ilang duwa dihang moharong kini sa Montana Pawnshop-Davao karong alas 5:30 sa hapon didto sa Xavier Gym. - Yoyo R. Abayan