Duremdes, Taulava nagsosyo sa PBA Player of the Week

Dahil sa pareho silang mahusay, nagtabla sina Kenneth Duremdes ng Sta. Lucia Realty at Paul Asi Taulava ng Talk N Text para sa karangalan ng Player of the Week award para sa linggong Hunyo 10-16.

Ang dalawang manlalaro ang sinandigan ng Realtors at Phone Pals upang makarating sila sa semifinal round ng kasalukuyang Samsung PBA All-Filipino Cup.

Sa laban ng Phone Pals kontra Ginebra, kumubra si Taulava ng 31 puntos, bukod pa ang 22 rebounds at anim na assists sa likod ng dalawang steals sa 43 minutong paglalaro upang trangkuhan ang Talk N Text sa kanilang panalo, 99-86 na naging sanhi upang tuluyan ng mapatalsik ang Kings sa kontensiyon.

"Asi was really at his best. Because of the system we employ, there was hardly any double team or it came late that’s why he got away with a lot of one-on-one moves underneath the basket," pahayag ni Talk N Text mentor Joel Banal.

Ang tagumpay ni Taulava ay pinarisan rin ni Duremdes nang manalasa ito sa opensa.

Makaraang umiskor ng career-high 42 puntos, muling nagpakitang-gilas si Duremdes nang makaharap nila ang San Miguel Beer.

Nagpakawala si Duremdes ng 10 triples at tumapos ng 40 puntos upang pangunahan ang Realtors na igupo ang Beermen sa iskor na 83-81.

"He gave us a big lift offensively. His outside shots made San Miguel pay for double-teaming down low," ani Sta. Lucia coah Alfrancis Chua.

Ngunit di sinasadyang kapitan ng malas si Duremdes nang sa huli nitong laro ay manakit ang kanyang calf muscle na dahilan upang tuluyan na siyang di makagiya sa Sta. Lucia sa loob ng dalawang linggo.