Alas Women handa na kontra China

MANILA, Philippines — Handang-handa ang Alas Pilipinas Women na labanan ang defending champion at nine-time gold medalist China sa kanilang unang laro sa women’s indoor volleyball competition ng 20th Asian Games sa Aichi-Nagoya, Japan.

Ito ay matapos na rin ang pagbabagong ginawa ni Japanese coach Taka Minowa sa final 12 roster ng Alas Women ilang araw bago sagupain ang mga Chinese bukas ng alas-12 ng tanghali sa Okazaki Central Park General Gymnasium.

Isinama ni Minowa sa official line-up sina dating University of the Philippines standout Niña Ytang at Adamson Lady Falcons star spiker Shaira Nitura.

Si Ytang ang ipinalit kay opposite hitter Erika Santos, habang si Nitura ang kinuha ni Minowa para kay veteran libero Dawn Macandili-Catindig.

Si Macandili-Catindig ang isa sa dalawang miyembro ng Alas Women na huling naglaro sa Asiad noong 2018 sa Jakarta, Indonesia maliban kay team captain at setter Jia De Guzman.

Bukod kina Ytang, Nitura at De Guzman, ang iba pang kasama sa Final 12 ay sina Alyssa Solomon, Bella Belen, Eya Laure, Angel Canino, Thea Gagate, Dell Palomata, Amie Provido, Mars Alba at Justine Jazareno.

Tumapos sa pang-walong puwesto ang tropang kinabibilangan nina De Guzman at Macandili-Catindig sa 2018 Jakarta Asiad.

Kasama ng Alas Women sa Pool B sa Aichi-Nagoya ang China at Kazakhstan.

Sa Huwebes makakatapat ng mga Pinay spikers ang mga Kazakhs sa alas-12 ng tanghali sa pagtatapos ng preliminary round.

Tinalo ng China ang Japan via straight sets sa nakaraang 2022 Hangzhou Games para angkinin ang pang-siyam na Asiad gold medal.