Hidilyn sasabak sa World Cup
MANILA, Philippines — Magpapasiklab ang Pinoy weightlifting team sa International Weightlifting Federation (IWF) World Cup na idaraos sa Phuket, Thailand mula sa Marso 31 hanggang Abril 11.
Nangunguna sa listahan si Tokyo Olympics gold medalist Hidilyn Diaz na target masungkit ang ikalimang sunod na Olympic spot.
Nasilayan na si Diaz sa apat na sunod na Olympics — noong 2008 sa Beijing, China, noong 2012 sa London, England, noong 2016 sa Rio de Janeiro, Brazil kung saan nakapilak ito, at noong 2021 sa Tokyo, Japan kung saan nito naitarak ang unang ginto ng Pilipinas sa Olympics.
Inaasahang papangalanan na ang mga magkukuwalipika sa Paris Olympics sa oras na matapos ang torneo.
Ang Phuket tournamet ang huling qualifying event para madetermina ang mga papasok sa Paris Games.
Umalis na kahapon ang delegasyon ng Pilipinas na pinamunuan ni Diaz kasama ang asawang si Julius Naranjo na nagsisilbing coach nito.
“And we are off to our final Olympic qualifier in Phuket. It has been an extraordinary journey for us and Team HD is excited to represent the country,” ani Naranjo sa post nito sa social media.
Tanging ang mga nasa Top 10 lamang sa world ranking ang papasok sa Paris Olympics.
Sa listahan ng IWF para sa Paris 2024 Olympic Qualification Rankings (OQR), nasa ikawalong puwesto si Diaz sa women’s 59-kilogram division.
Nagpartisipa ito sa IWF World Championships sa Riyadh, Saudi Arabia kung saan bumuhat ito ng 224 kg.
Nangunguna sa dibisyon ni Diaz si Chinese lifter Luo Shifang.
Kasama ni Diaz sina Olympian Elreen Ando at Rosegie Ramos na nasa women’s 49 kg, Vanessa Sarno at Kristel Macrohon na nasa women’s 71 kg, at John Febuar Ceniza na nasa men’s 61 kg.
Base sa world ranking, malaki rin ang tsansa nina Ceniza, Ramos at Sarno na makapasok sa Paris Olympics.
Kasalukuyang nasa ikaanim si Ceniza habang ikasiyam naman si Ramos at ikalima si Sarno.
- Latest
