EDITORYAL — Curfew sa mga bata

Gipahinumdoman na sab sa mga lokal nga opisyales sa nagkalain-laing local government units ang ilang mga konstituwente may labot sa hugot nga pagpatuman sa curfew ordinance sa mga kabataang menor de edad.

Ning bag-o, ang lungsod sa Liloan mipahibalo bahin sa ilang curfew nga magsugod alas-10 sa gabii hangtud alas-4 sa kaadlawon pagkasunod adlaw.

Gipahibalo kini human sa nahitabong pagpangrakrak nga nakaigo og tulo diin usa niini 16-anyos nga babaye nga nakabsan gyud sa kinabuhi. Giingong gang war ang motibo.

Peligro kaayo para sa mga bata ang magsuroy-suroy ini’g lawom na ang kagabhion hangtud sa kaadlawon.

Gawas nga posible silang mabiktima, duna say mga tentasyon nga mohimo sila og krimen tungod sa hulhog sa ilang mga barkada nga parehas nila wala sab maghunahuna og tarong o wala maminsar unsay sangputanan sa ilang pagabuhaton.

Kaning curfew sa mga kabataan dugay na ni kaayo, ang mabasol niini ang mismong mga ginikanan tungod kay sila man gyuy nakahibalo sa mga lakaw sa ilang mga anak.

Apan duna man gyuy mga anak nga gahi gyud og ulo ug molighot gyud bisan unsaon pagmaymay, mosuki gyud ug ang pagbuot maoy matuman.

Sagad ani nila, mga batang kuwang nang daan og respeto sa ilang mga ginikanan ug mga maguwang diha sa panimalay, tungod pud tingali badlungon pud ilang mga katinguwangan sa balay o wala lang gyuy panahon pagtutok kanila.

Pagkatinuod ani, sagad aning mga kabataang maglaag-laag panahon sa kagabhion nagagikan sa mga pamilyang duna say problemang pinansiyal. Ang kakabus usa sa mga hinungdan nganong usahay mapasagdan na sa mga ginikanan ang ilang mga anak.

Aning puntoha dako og papel ang mga barangay tanod sa mga barangay ug ang barangay officials ingon man ang lokal nga pangamhanan sa lungsod o sa siyudad.

Pinaagi sa ordinansa, dunay tsansa nga masalbar kining mga kabataang dili gustong magpadisiplina sa ilang mga ginikanan.

Apan kuwang lang gyud kaayo og implimentasyon, anha lang maghigpit kun duna na say dautang nahitabo sa mga kabataan. Dili lang dapat mga polis ang mohimo niini, kondili hasta gyud ang mga tanod ug barangay officials.