EDITORYAL — Impeachment vs VP

Karong adlawa sugdan na ang impeachment trial batok kang bise presidente Sara Duterte diha sa Senado.

Si Duterte nag-atubang og kaso may kalabotan sa paggastos sa iyang confidential funds ug ang paghulga sa kinabuhi ni Presidente Ferdinand Marcos Jr., First Lady Lisa Araneta Marcos ug kanhi House Speaker Martin Romualdez.

Samtang tanang habig sa trial, ang prosekusyon nga gilangkuban sa mga kongresista ug mga hukom nga gilangkuban sa mga senador, nipadayag na sa ilang kaandam, naay pipila ka hisgutanan ang medyo hanap.

Usa niini ang BIR box nga giingong gisudlan sa mga record sa mga trasaksyon sa mga buhis ni Duterte ug sa iyang bana nga si Maneses Carpio.

Gusto kining ipresentar sa prosekusyon isip ebidensiya para pamatud-ang dunay dili maesplikar nga bahandi ang bise presidente, apan kusganon kining gisupak sa depensa.

Ang mga senador miingon nga dili nila puydeng tip-igan o hipuson sa Senado ang maong BIR box kay dili kini ebidensiya sa impeachment trial ug supak sa balaod kini sa balaod. Ang pangutana nalang karon, kung magamit pa ba gihapon kini isip ebidensiya sa usa sa mga kaso ni bise presidente?

Ang Senado miingon nga bugtong ang presidente lang sa nasud maoy dunay gahum kung kinahanglan kining ablihan o dili ug gamiton ang sulod isip ebidensiya batok sa bise presidente.

Si Senador Panfilo Lacson miingon nga basi sa Section 71 sa National Internal Revenue Code , ang pag-abli sa maong box nagkinahanglan og written authority sa Presidente sa nasud kun dunay rekomendasyon sa BIR ug sa Department of Finance, o written waiver gikan sa respondent.

Sa ato pa, dako ang purohan nga paablihan gyud kini atol sa impeachment trial – kay kun balaod ang sukaranan para kini maablihan, si Marcos ra gyud ang makamando niini.

Aning paagiha dili mabasol ug dili mapasanginlan ang mga Senador nga bias batok sa bise presidente.